امریکی محکمہ خارجہ نے ایک سیکورٹی الرٹ میں انکشاف کیا ہے کہ قونصل جنرل کراچی کو شہر کے اعلیٰ درجے کے ہوٹلوں کو درپیش ممکنہ خطرے سے متعلق رپورٹ موصول ہوئی ہے۔

اس تناظر میں کراچی میں امریکی قونصل خانے نے ان ہوٹلوں کے لیے امریکی سرکاری اہلکاروں کے دورے عارضی طور پر محدود کر دیے ہیں۔

محکمہ خارجہ کا کہنا ہے کہ ایسے خطرات کی صورت میں، وہ بعض اوقات غیر ملکی ممالک میں موجود سیاحتی مقامات، ہوٹلوں، بازاروں، شاپنگ مالز اور ریستورانوں کو امریکی سرکاری اہلکاروں کے لیے ممنوعہ قرار دے دیتا ہے۔

سیکورٹی الرٹ میں امریکی شہریوں پر زور دیا گیا ہے کہ وہ ایسے علاقوں اور بھیڑ بھاڑ سے گریز کریں، غیر نمایاں طرزِ عمل اپنائیں اور ان مقامات پر ہوشیار رہیں جہاں مغربی ممالک کے شہری یا سیاح زیادہ آتے ہیں۔

واضح رہے کہ پاکستان کے لیے جاری امریکی سفری ہدایت (ٹریول ایڈوائزری) کے تحت امریکی شہریوں کو دہشت گردی اور ممکنہ مسلح جھڑپوں کے خدشات کے پیش نظر سفر پر نظرِثانی کی ہدایت کی گئی ہے۔