وزارت خزانہ کی جانب سے جاری کردہ بیان میں کہا گیا کہ حکومت پاکستان امریکہ کے ساتھ ٹیرف سے متعلق مذاکرات کی کامیاب تکمیل کا اعلان کرتے ہوئے خوشی محسوس کرتی ہے۔

ان مذاکرات کے نتیجے میں امریکہ کو پاکستانی برآمدات پر 19 فیصد ٹیرف نافذ ہوگا، جو کہ پہلے مجوزہ 29 فیصد کے مقابلے میں نمایاں طور پر کم ہے۔

جمعرات کو امریکی صدر ڈونلڈ ٹرمپ نے پاکستان سمیت درجنوں ممالک سے درآمد ہونے والی اشیاء پر 41 فیصد تک کے نئے ٹیرف کا اعلان کیا تھا، جس کی وجہ دوطرفہ تجارتی تعلقات میں عدم توازن اور باہمی برابری کی کمی کو قرار دیا گیا تھا۔

وزارت خزانہ کے بیان میں کہا گیا کہ یہ فیصلہ امریکی حکام کی متوازن اور مستقبل پر نگاہ رکھنے والی حکمت عملی کو ظاہر کرتا ہے، جو پاکستان کو جنوبی اور جنوب مشرقی ایشیائی ممالک کے مقابلے میں مسابقتی حیثیت میں رکھتا ہے۔ خاص طور پر ٹیکسٹائل جیسے اہم شعبوں میں یہ ٹیرف سطح پاکستان کی برآمدی صلاحیت کو سہارا دے گی، جو ملکی برآمدات کی ریڑھ کی ہڈی ہے۔

وزیر خزانہ نے کہا کہ وہ متعلقہ اسٹیک ہولڈرز سے قریبی رابطے میں ہیں اور اس بات پر یقین رکھتے ہیں کہ موجودہ ٹیرف بندوبست امریکہ کی مارکیٹ میں پاکستان کی موجودگی بڑھانے کا ایک اہم موقع فراہم کرتا ہے۔

بیان میں کہا گیا کہ اب ضروری ہے کہ پاکستانی برآمد کنندگان اور تجارتی ادارے جارحانہ اور مرکوز مارکیٹنگ حکمت عملی اپنائیں تاکہ اس پیشرفت سے بھرپور فائدہ اٹھایا جا سکے۔

وزارت نے مزید کہا کہ ٹیکسٹائل کے علاوہ دیگر شعبوں میں بھی نمایاں ترقی کی گنجائش موجود ہے۔ حکومت برآمد کنندگان کو پالیسی معاونت، مارکیٹ انٹیلیجنس اور تجارتی فروغ کی کوششوں کے ذریعے سہولیات فراہم کرنے کے لیے پُرعزم ہے۔

بیان کے مطابق حکومت پاکستان امریکہ کے ساتھ سرمایہ کاری، مصنوعی ذہانت، کرپٹو کرنسی، معدنیات، توانائی اور دیگر ابھرتے ہوئے شعبوں میں قریبی تعاون چاہتی ہے۔

اختتام پر بیان میں کہا گیا کہ پاکستان صدر ٹرمپ اور امریکی انتظامیہ کے ساتھ قریبی روابط جاری رکھے گا تاکہ اقتصادی ترقی اور باہمی خوشحالی کے مشترکہ اہداف کو فروغ دیا جا سکے۔