اس وقت عالمی مالیاتی نظام ایک عجیب کیفیت میں معلق ہے، توقع اور انکار کے درمیانی حصار میں۔ اس سال کے اوائل میں متعارف کروائے گئے ”یومِ آزادی“ ٹیرف نے عالمی سطح پر وہ ہلچل مچائی جو آخری بار کووڈ کے عروج پر دیکھی گئی تھی۔ اس کے بعد ایک وقتی ریلیف آیا اور منڈیاں سنبھلنے لگیں۔ اب وہی منظرنامہ ایک بار پھر سامنے آ رہا ہے: ٹرمپ دھمکی دیتے ہیں، منڈیاں لرزتی ہیں، پھر کچھ نرمی آ جاتی ہے۔ لیکن اس بار یہ کھیل پائیدار دکھائی نہیں دیتا۔

گزشتہ ہفتے اسٹاک ہوم میں ہونے والے مذاکرات میں پہلی بار چین کی طرف سے توسیع کا باضابطہ اشارہ ملا۔ بیجنگ کے تجارتی نمائندے نے اعلان کیا کہ وقفہ بڑھا دیا گیا ہے، تاہم امریکی محکمہ خزانہ نے فوری وضاحت جاری کی کہ حتمی فیصلہ صرف صدر ٹرمپ کے دستخط سے مشروط ہے۔ اس حکومت میں یہ صرف رسمی کارروائی نہیں، بلکہ خود ایک پالیسی متغیر ہے۔

ڈیڈ لائن 12 اگست ہے۔ اگر ٹرمپ مزید 90 دن کی مہلت دیتے ہیں تو سال کے آخر میں صدر شی سے براہِ راست ملاقات کی راہ ہموار ہو سکتی ہے۔ بصورتِ دیگر چینی مصنوعات پر 15 سے 30 فیصد ٹیرف، جو اس سال کے عدم استحکام کا پہلے ہی حصہ ہیں، پوری شدت سے واپس آ جائیں گے اور چین کا جواب دینا ناگزیر ہو جائے گا۔ ایسے میں جب عالمی حصص بازار نیچے گرنے لگیں گے تو کسی کو حیرت نہیں ہو گی۔

یہ کہنا مبالغہ نہیں کہ مالیاتی منڈیاں اب ٹیرف مذاکرات کو ایک قلیل مدتی سرمایہ کاری حکمتِ عملی کے طور پر برتنے لگی ہیں۔ اسے کچھ لوگ ”TACO ٹریڈ“ کہتے ہیں، یعنی Trump Always Chickens Out (ٹرمپ ہمیشہ آخر وقت میں پسپا ہو جاتے ہیں)۔ جب دھمکیاں دی جائیں، تو رسک آن؛ جب عمل ہو، تو رسک آف۔ ایک خطرناک سفارتی کھیل، جو سرمایہ کارانہ سائیکل میں ڈھل چکا ہے۔

لیکن اس بار معاملہ مختلف ہے۔ چین، دنیا کی دوسری بڑی معیشت، توقع سے زیادہ معاشی سست روی کا شکار ہے۔ اُسے برآمدی مواقع درکار ہیں۔ نایاب ارضیاتی دھاتوں کی برآمدات میں بہتری آ چکی ہے، سیمی کنڈکٹر کنٹرول میں نرمی آئی ہے، اور تائیوان کے حوالے سے بھی بیجنگ نے زیادہ محتاط رویہ اپنایا ہے۔ یہ سب اقدامات کسی مفاہمت کی تیاری محسوس ہوتے ہیں۔ لیکن حتمی فیصلہ ٹرمپ کے ہاتھ میں ہے — اور منڈیاں اس حقیقت سے بخوبی واقف ہیں۔

اسی لیے منڈیوں میں دباؤ کے ابتدائی آثار واضح ہو چکے ہیں۔ جیسے ہی توسیع پر غیر یقینی کی خبریں آئیں، S&P 500، امریکہ کا نمایاں اسٹاک انڈیکس، کی چھ روزہ ریلی ٹوٹ گئی۔ امریکی بانڈز کی طلب میں اضافہ ہوا، ایشیائی کرنسیاں نیچے آئیں، اور تجارتی انحصار والی کمپنیاں خسارے میں رہیں۔ اگرچہ یہ مکمل بحرانی کیفیت نہیں، لیکن سکون کی حالت بھی نہیں۔

ایک دلچسپ پہلو یہ ہے کہ حتیٰ کہ اگر مجوزہ سربراہی اجلاس کامیاب بھی ہو جائے، تو بھی اس سے بنیادی مسائل حل نہیں ہوں گے۔ یہ دو معاشی سپرپاورز اب طویل المدتی مسابقت میں بندھ چکی ہیں — خواہ وہ اے آئی چپس ہوں یا دفاعی سپلائی چینز۔ آنے والے دنوں میں اصل سوال یہ نہیں کہ جنگ بندی میں توسیع ہوتی ہے یا نہیں، بلکہ یہ ہے کہ آیا کوئی پائیدار فریم ورک کی جھلک بھی سامنے آتی ہے یا نہیں۔ سرمایہ کار امن پر نہیں، بلکہ معاشی منظرنامے کی شفافیت (visibility) پر داؤ لگا رہے ہیں۔

عالمی مالیاتی فنڈ (آئی ایم ایف) کی جانب سے عالمی نمو کے تخمینے میں حالیہ بہتری بھی اسی امید پر قائم ہے: امریکہ کی مضبوط کارکردگی، چین میں جزوی استحکام، اور سپلائی شاکس میں کمی۔ لیکن ہر پیش گوئی اب ”ٹیرف غیر یقینی صورتحال“ اور ”جغرافیائی خطرات“ کے حاشیوں کے ساتھ آتی ہے۔ اگر یہ وقفہ برقرار رہا تو شاید عالمی منڈیاں سنبھلی رہیں؛ بصورت دیگر، ایک وسیع پیمانے پر قیمتوں کی از سرِ نو درجہ بندی متوقع ہے۔

یہ بھی دیکھنے کی بات ہے کہ دیگر معیشتیں خود کو کیسے پوزیشن کر رہی ہیں۔ جاپان اور یورپی یونین نے پہلے ہی ڈیڈ لائن سے قبل واشنگٹن کے ساتھ اپنے الگ ٹیرف معاہدے طے کر لیے ہیں۔ یہ مستقل تزویراتی اتحاد نہیں، بلکہ عارضی حکمتِ عملی ہے، ایسی چالیں جو ایک غیر متوقع ٹیرف ماحول میں راستے نکالنے کی کوشش ہیں، جو خود غیر یقینی کا سبب بھی ہے اور نتیجہ بھی۔

آئندہ دس روز سفارتکاری اور خطرے کے ساتھ ساتھ چلیں گے۔ امریکہ کو نایاب دھاتوں اور جدید مٹیریلز پر ضمانتیں درکار ہیں؛ چین چاہتا ہے کہ اُس پر نئے جرمانے بلاجواز نہ لگیں۔ دونوں جانب سے طاقت کے مظاہرے جاری ہیں، لیکن واپسی کے راستے بھی کھلے رکھے جا رہے ہیں۔ چاہے توسیع ہو یا نہ ہو، یہ لمحہ فیصلہ کن ہو گا۔ اگر ٹرمپ دستخط کرتے ہیں تو یہ کمزور سی مفاہمت کو تقویت دے گا، ایسی مفاہمت جو عالمی معیشت کو چلنے تو دیتی ہے، لیکن بے یقینی کے سائے تلے۔

اگر دستخط نہیں ہوتے اور منڈیوں کو کوئی واضح نقشہ نظر نہ آیا، تو شدید اتھل پتھل کا امکان ہے۔ قلیل مدتی معاہدہ وقتی سکون تو دے سکتا ہے، لیکن اگر کوئی نظام نہ ہو، تو عدم استحکام لوٹ کر آنا یقینی ہے۔

اگر سربراہی اجلاس ہوتا ہے تو وہ خود بخود اہمیت حاصل کرے گا، لیکن اس کی قدر اس بات پر ہو گی کہ آیا یہ واقعی کوئی مؤثر فریم ورک پیش کرتا ہے، یا محض اختلافات پر پردہ ڈالنے کی کوشش۔ مالیاتی منڈیاں، جو عرصے سے ڈرامائی مناظر کی عادی ہیں، اس بار حقیقت پر نظر رکھے ہوئے ہیں — اس اشارے کی تلاش میں کہ آیا دنیا کی دو سب سے بڑی معیشتیں ایک دوسرے سے مسابقت کو عالمی نظام کے لیے خطرہ بنائے بغیر سنبھال سکتی ہیں۔

یہی بات آئندہ پندرہ دنوں کو غیر معمولی اہمیت دیتی ہے۔ یہ فیصلہ کن موڑ اس لیے نہیں آیا کہ دنیا اسے چاہتی ہے، بلکہ اس لیے کہ دنیا کی دو بڑی طاقتیں ایک بار پھر اُسے وہاں لے آئی ہیں۔ شدت میں اضافہ مہنگا سودا ہے، اور غیر یقینی کی قیمت شاید اُس سے بھی زیادہ۔

اور سرمایہ کار، آخرکار، نعرے نہیں، اشارے چاہتے ہیں۔

کاپی رائٹ بزنس ریکارڈر، 2025