پریس کانفرنس میں جیروم پاول نے واضح کیا کہ فیڈ کا مرکزی ہدف مہنگائی پر قابو پانا ہے، نہ کہ حکومت کے قرضے یا رہائشی قرضوں کی لاگت کو کم کرنا جیسا کہ صدر ٹرمپ چاہتے ہیں۔ انہوں نے کہا کہ تجارتی پالیسیوں اور درآمدی ٹیرف میں تبدیلی کے باعث مہنگائی کے خطرات اب بھی بلند ہیں، اس لیے شرح سود میں نرمی سے قبل مزید ڈیٹا درکار ہے۔

انہوں نے کہا کہ یہ ابھی ابتدائی مرحلہ ہے۔ اگلی میٹنگ سے پہلے بہت سا ڈیٹا آئے گا، مگر یہ کہنا مشکل ہے کہ وہ فیصلہ کن ہو گا یا نہیں۔

ان بیانات کے بعد سرمایہ کاروں نے ستمبر میں شرح سود میں کمی کے امکانات 70 فیصد سے کم کر کے 50 فیصد سے بھی نیچے کر دیے۔ امریکی ٹریژری بانڈز کے شرح منافع میں اضافہ ہوا جبکہ اسٹاک مارکیٹ معمولی حد تک نیچے بند ہوئی۔

امریکا بینک کے چیف اکنامسٹ بل ایڈمز نے پیشگوئی کی کہ فیڈ رواں سال دسمبر میں ہی شرح سود میں کمی کرے گا۔ اگر بیروزگاری کی شرح مستحکم رہی اور ٹیرف کے باعث مہنگائی بڑھی تو اگلے چند ماہ میں شرح کم کرنا مشکل ہو جائے گا۔

فیڈ کے 9-2 ووٹ سے ہونے والے اس فیصلے میں دو گورنرز، مشیل بومن اور کرسٹوفر والر، نے مخالفت کی — جو گزشتہ 30 برسوں میں پہلی بار دو گورنرز کی مخالفت ہے۔ دونوں کا تقرر صدر ٹرمپ نے کیا تھا۔

پاول نے کہا کہ ان کی کوشش ہے کہ شرح سود میں کمی کا فیصلہ درست وقت پر کیا جائے، نہ اتنی جلدی کہ مہنگائی دوبارہ سر اٹھائے، اور نہ اتنی دیر سے کہ لیبر مارکیٹ کو نقصان پہنچے۔

انہوں نے کہا کہ اگر ہم بہت جلد حرکت کریں تو مہنگائی کو پوری طرح کنٹرول نہیں کر پائیں گے۔ اگر بہت دیر کریں تو روزگار کا شعبہ متاثر ہوگا۔ ہمارا ہدف ہے کہ ہم مؤثر انداز میں مہنگائی قابو میں رکھیں۔

فیڈ کی نئی پالیسی رپورٹ میں بھی فوری شرح کمی کا کوئی اشارہ نہیں دیا گیا۔ رپورٹ میں کہا گیا کہ بیروزگاری کی شرح تقریباً 4 فیصد پر مستحکم ہے اور لیبر مارکیٹ کے حالات مضبوط ہیں۔

جون میں فیڈ نے سال کے آخر تک مہنگائی 3 فیصد تک بڑھنے کی پیش گوئی کی تھی۔ نیا مہنگائی ڈیٹا جمعرات کو جبکہ جولائی کی ملازمتوں کی رپورٹ جمعے کو جاری ہوگی، جس کی روشنی میں ستمبر میں شرح سود سے متعلق فیصلہ ہوگا۔

دوسری سہ ماہی میں امریکی معیشت کی شرح نمو توقع سے زیادہ رہی، لیکن یہ بہت حد تک درآمدات میں کمی کی وجہ سے تھی، جبکہ اندرونی طلب گزشتہ ڈھائی سال میں کم ترین سطح پر رہی۔

گورنر ایڈریانا کوگلر اس میٹنگ میں شریک نہیں تھیں۔