اور یہ بھی کہ جب علویوں کو بحیرۂ روم کے ساحلی علاقوں میں – خاص طور پر لاذقیہ کے گرد و نواح میں، جو اسد خاندان کا آبائی علاقہ ہے، ذبح کیا جائے گا، تو کوئی آنکھ نہ جھپکے گی۔ درحقیقت، بچ جانے والے عینی شاہدین کے مطابق، وہاں سیکڑوں افراد کو فوری طور پر گولی مار دی گئی، جن میں سے کئی کے قاتل ’شلوار قمیض پہنے ہوئے مرد‘ تھے۔ لیکن جب حملہ دروز پر ہو گا تو اسرائیل مداخلت کرے گا، کیونکہ لاذقیہ کے برعکس، ان کا گڑھ سویدا جولان کی پہاڑیوں سے متصل ہے، وہی علاقہ جسے اسرائیل گزشتہ پچاس برس سے گھیرنے اور مضبوط کرنے کی کوشش میں ہے۔

لیکن اب لوگ سوچ رہے ہیں کہ کیا اردوان واقعی حیران ہیں؟ اب یہ بات کھل کر سامنے آ چکی ہے کہ وہ اسرائیل اور امریکہ کے ساتھ اسد کو ہٹانے کے منصوبے میں برابر کے شریک تھے؛ ترکی نے عسکری سازوسامان فراہم کیا، اسرائیل نے وہ انٹیلی جنس مہیا کی جو صرف موساد ہی دے سکتا ہے اور ’انکل سام‘ (امریکہ) کی آشیر باد سے وہ ایک جاہل سلفی جہادی شدت پسند کو اقتدار میں لانے میں کامیاب ہو گئے، جو نہ صرف مغرب سے جنگ کا علانیہ مطالبہ کر چکا ہے، بلکہ مسلم اقلیتوں کے نسلی صفایا اور قرون وسطیٰ کے قوانین نافذ کرنے کی بات کرتا ہے، اور اسے دنیا کے سب سے سیکولر ممالک میں سے ایک کی قیادت دے دی گئی۔

ایسا معلوم ہوتا ہے کہ اسد خاندان کی نصف صدی پر محیط حکمرانی نے دنیا کو یہ بھلا دیا کہ شام کے حکمرانوں کے کیریئر، اور اکثر ان کی زندگیاں، کتنی تیزی سے اختتام کو پہنچ سکتی ہیں۔ آخرکار، حافظ الاسد خلافتِ امویہ کے معاویہ کے بعد شام کے سب سے طویل عرصے تک حکمرانی کرنے والے رہنما تھے۔ اور بشار کی مدتِ اقتدار صرف ان کے بعد دوسرے نمبر پر آتی ہے۔ ایک ایسا تخت جو ہزاروں فالٹ لائنوں پر ہزاروں سال سے قائم ہے، ان اعداد و شمار کی اہمیت ہے۔

بظاہر الشرع ادلب کی جانب فرار ہو گیا، جہاں ترکوں نے اس کے لیے ایک قلعہ تعمیر کر رکھا ہے، اُس وقت جب اسرائیلی طیاروں نے صدارتی محل کی بیرونی دیوار کو نشانہ بنایا، اور اس سے محض ایک منٹ قبل وزارتِ دفاع کی مرکزی عمارت کے بڑے حصے پر بمباری کی تھی۔ مگر اگر وہ مارا گیا ہوتا؟ یا اگر اُس کا قتل کر دیا جائے، جو شام کی ہزاروں سالہ تاریخ میں استثنا نہیں بلکہ ایک معمول کے قریب تر ہے، تو اُس کے جہادی نائب جانشینی کے لیے کس کی طرف رجوع کریں گے؟ انقرہ، تل ابیب، یا واشنگٹن؟

رابرٹ فسک کی ابتدائی تحریروں میں کہیں گہرائی میں آپ کو ’بوڑھے حافظ‘ کا حوالہ ملے گا، جو پیش گوئی کرتا تھا کہ شام کسی بیرونی حملہ آور کے ہاتھوں نہیں گرے گا، بلکہ اندر سے ٹوٹ کر بکھرے گا۔ اور اگرچہ حافظ ایک ایسا بے رحم سیاست دان تھا جس کی رگوں میں برف جیسا خون دوڑتا تھا، اور جو دمشق میں اقتدار اور اپنی بقا کے لیے صفر جمع صفر کی ظالمانہ سیاست کا ماہر تھا، اس کا بیٹا بشار ویسا نہیں تھا۔ چنانچہ حافظ نے ہر بغاوت کو کچلا، ہر طاقتور فریق سے بات چیت کی، اور شام کو مشرق وسطیٰ میں ایک ایسا کلیدی ثالث بنا دیا کہ رچرڈ نکسن سے لے کر بل کلنٹن تک تمام امریکی صدور نے اُس کی خوشنودی حاصل کرنے کی کوشش کی۔ لیکن بشار میں وہ فطری سیاسی سوجھ بوجھ نہیں تھی۔ چنانچہ جب معاملہ سخت ہوا اور باہر سے مدد نہیں آئی، تو وہ اس اندرونی بگاڑ پر قابو نہ رکھ سکا۔

ایک طرح سے، اسد خاندان کی تقدیر پر اُسی وقت مہر ثبت ہوگئی تھی جب حافظ الاسد کے بڑے بیٹے اور نامزد جانشین، باسل، 1994 میں ایک کار حادثے میں ہلاک ہو گیا۔ کہتے ہیں جب حافظ کو یہ خبر دی گئی تو وہ خاموشی سے ایک بڑے اجلاس سے اٹھ کر باہر چلا گیا، اور اتنی بلند آواز میں چیخا کہ اس کی گونج پورے دمشق میں سنائی دی۔ برسوں بعد، جب الشرع کے لوگوں نے اپنی فتح کا جشن مناتے ہوئے باسل کی قبر کی بے حرمتی کی، تو وہ درحقیقت حافظ کی پیش گوئی کو سچ ثابت کر رہے تھے۔ شام، اندر سے ٹوٹ چکا تھا۔

اب، جب کہ ایک ملّا حکومت، جو شام کی سیکولر شناخت کے بالکل منافی ہے، اپنی بقا کے لیے کچھ ممالک سے یہ امید لگائے بیٹھی ہے کہ وہ دوسرے ممالک اور اُن کے اثرات کو اسے تباہ کرنے سے روکیں گے، تو سوال یہ ہے: شام ایک اور اندرونی ٹوٹ پھوٹ سے کتنی دور ہے؟ اگر شراع مارا جاتا ہے، یا (جیسا کہ وہ پہلے ہی ہے) مزید غیر مستحکم ہو جاتا ہے، تو کب تک ایرانی، عراقی اور لبنانی اثرات، جو اچانک اپنی گرفت سے محروم ہو چکے ہوں، مزید آگ بھڑکانے کا باعث نہیں بنیں گے؟

چاہے کچھ بھی ہو، شام میں اسرائیل کی بتدریج مداخلت میں اضافہ ہوتا رہے گا، اور یہودی ریاست اس تمام صورتحال کی واحد واضح فاتح ہوگی — حالانکہ اس کا وہ بڑا منصوبہ، جو حیرت انگیز مہارت سے حماس کی تباہی، حزب اللہ کی قیادت کے ڈھانچے کے مکمل خاتمے، اور دمشق کے تاریخی سقوط کے ساتھ آگے بڑھا تھا، اس وقت مکمل نہ ہو سکا جب اس نے تہران میں آیات اللہ کی شہ رگ پر ہاتھ ڈالنے کی کوشش کی۔

اسرائیل واقعی چاہتا تھا کہ ایران میں موجودہ حکمران نظام ختم ہو جائے، یہ تو بالکل آخری مرحلہ تھا۔ اور شاید ایسا ہو بھی جاتا، اگر جنگ میں ایران کی حیران کن مزاحمت نہ ہوتی، جس نے پیش قدمی کو روک دیا اور منصوبے کو دوبارہ ترتیب دینے پر مجبور کر دیا۔ اب یہ دیکھنا باقی ہے کہ یہ خاص انجام کس طرح سامنے آتا ہے۔

لیکن یہ واضح ہے کہ شام کی جو ریاستی حیثیت باقی ہے، وہ ایک ایسی ملیشیا کے ہاتھ میں ہے جو ادھار لیے ہوئے لباس پہنے ہوئے ہے، اور جسے غیر ملکی عناصر سہارا دے رہے ہیں جن کی اس زمین میں نہ جڑیں ہیں اور نہ کوئی یاد داشت۔ اور جیسا کہ ہمیشہ ہوتا ہے، جب غیر ملکی مفادات کا توازن بدلے گا تو وہی ریت ان کے قدموں تلے بھی سرک جائے گی۔

تختِ دمشق ہمیشہ ایک عارضی مسند رہا ہے، کبھی بادشاہوں کے لیے، کبھی علما کے لیے، کبھی سپاہیوں کے لیے۔ مگر کبھی دیرپا نہیں۔ کیونکہ یہ سرزمین کبھی بھی استحکام برداشت نہیں کرتی۔ یہ خطہ زمین کی گہری دراڑوں، یعنی سیاسی و جغرافیائی فالٹ لائنز پر واقع ہے، اور مدتوں سے مختلف سلطنتوں کے مفادات کا مرکز رہا ہے۔ اور کبھی کبھار تو اپنے ہی بوجھ تلے بہت آسانی سے منہدم ہو جاتا ہے۔

چنانچہ ایک بار پھر شام خوابِ غفلت میں ٹوٹ پھوٹ کی طرف بڑھ رہا ہے؛ اور ایسا آخری بار نہیں ہوگا۔ یہ تو صرف اُس چکر کا ایک اور موڑ ہے، جو اُن ملکوں سے بھی زیادہ قدیم ہے جو آج اس کے تخت پر اپنی چالیں چل رہے ہیں۔

کاپی رائٹ بزنس ریکارڈر، 2025