بدھ کے روز جاری کردہ ایشیائی ترقیاتی جائزہ (ایشین ڈیولپمنٹ آؤٹ لک) (اے ڈی او) – جولائی 2025 رپورٹ میں کہا گیا ہے کہ ”پاکستان نے مالی سال 2025 (جو 30 جون 2025 کو ختم ہوا) میں عبوری طور پر 2.7 فیصد ترقی کی ہے، جس کی بنیاد پر شرحِ نمو کے تخمینے میں معمولی بہتری کی گئی ہے جبکہ مالی سال 2026 کے لیے پیشگوئی میں کوئی تبدیلی نہیں کی گئی۔“

رپورٹ میں مزید کہا گیا ہے کہ ”ترمیم شدہ شرحِ نمو میں صنعت اور خدمات کے شعبوں میں توقع سے زیادہ بہتری کو شامل کیا گیا ہے اگرچہ زرعی پیداوار میں متوقع کمی برقرار رہی۔“

رپورٹ میں یہ بھی نشاندہی کی گئی ہے کہ قیمتوں کے دباؤ میں کمی کے باعث ملک کی مہنگائی کی پیشگوئی کو مالی سال 2025 کے لیے کم کر دیا گیا ہے۔

”پاکستان میں خوراک اور غیر غذائی اشیاء کی قیمتوں میں مالی سال 2025 کے ابتدائی 11 مہینوں میں تیزی سے کمی آئی، جس کے نتیجے میں مہنگائی کا تخمینہ کم کر دیا گیا ہے جبکہ مالی سال 2026 کی پیشگوئی برقرار ہے۔“

ایشین ڈیولپمنٹ بینک (اے ڈی بی) نے ترقی پذیر ایشیا اور پیسفک خطے کی معیشتوں کے لیے رواں سال اور آئندہ سال کی شرحِ نمو میں کمی کا تخمینہ لگایا ہے۔ اس کمی کی بڑی وجوہات میں امریکی ٹیکسز میں اضافے کی توقع، عالمی تجارت میں غیر یقینی صورتحال اور مقامی طلب میں کمزوری شامل ہیں۔

رپورٹ کے مطابق اس سال خطے کی معیشتیں 4.7 فیصد کی شرح سے ترقی کریں گی جو کہ اپریل میں جاری کیے گئے تخمینے سے 0.2 فیصد پوائنٹس کم ہے۔ آئندہ سال کی ترقی کی پیشگوئی بھی 4.7 فیصد سے کم ہو کر 4.6 فیصد کر دی گئی ہے۔

بین الاقوامی مالیاتی ادارے نے خبردار کیا ہے کہ اگر امریکی ٹیکسز اور تجارتی کشیدگی میں اضافہ ہوا تو یہ ترقی پذیر ایشیا اور پیسفک خطے کی معیشتوں کو مزید نقصان پہنچا سکتا ہے۔ دیگر خطرات میں عالمی سپلائی چین کی رکاوٹیں، توانائی کی قیمتوں میں اضافہ اور چین کی جائداد کی مارکیٹ کی غیر متوقع خراب صورتحال شامل ہیں۔

ایشین ڈیولپمنٹ بینک کے چیف اکنامسٹ البرٹ پارک نے کہا ہے کہ ”ایشیا اور پیسفک نے اس سال بڑھتے ہوئے عالمی چیلنجز کا سامنا کیا ہے تاہم معیشتی صورتحال غیر یقینی اور خطرات کی شدت کی وجہ سے کمزور ہو گئی ہے۔ خطے کی معیشتوں کو چاہیے کہ وہ اپنی بنیادی معاشی ڈھانچے کو مضبوط کریں، آزاد تجارت کو فروغ دیں اور علاقائی انضمام کو بڑھائیں تاکہ سرمایہ کاری، روزگار اور ترقی کو سہارا ملے۔“

اسی رپورٹ میں جنوبی ایشیا کی شرح نمو کو 2025 کے لیے 5.9 فیصد مقرر کیا گیا ہے جو اپریل 2025 کی رپورٹ میں 6.0 فیصد تھی۔ بھارت اور سری لنکا کی جی ڈی پی میں کمی کی وجہ بنیادی طور پر امریکی ٹیرف پالیسیوں کے اثرات کو بتایا گیا ہے۔