انڈیکس کے مطابق سنگاپور نے دنیا کے سب سے طاقتور پاسپورٹ کا اعزاز برقرار رکھا ہے، جس کے حاملین کو 227 میں سے 193 مقامات تک بغیر ویزا رسائی حاصل ہے۔

یہ انڈیکس انٹرنیشنل ایئر ٹرانسپورٹ ایسوسی ایشن (آئی اے ٹی اے) کے ڈیٹا پر مشتمل ہے اور دنیا کے تمام پاسپورٹس کو اس بنیاد پر درجہ بندی کرتا ہے کہ ان کے حاملین کتنے مقامات پر بغیر پیشگی ویزا داخل ہو سکتے ہیں۔

ایشیائی ممالک عالمی نقل و حرکت کی دوڑ میں آگے ہیں، جاپان اور جنوبی کوریا مشترکہ طور پر دوسرے نمبر پر ہیں، ہر ایک اپنے شہریوں کو 190 مقامات تک بغیر ویزا رسائی فراہم کرتا ہے۔

یورپی ممالک کی ایک بڑی تعداد نے باقی ٹاپ 5 پوزیشنیں سنبھالی ہیں۔ سات یورپی یونین پاسپورٹس — ڈنمارک، فن لینڈ، فرانس، جرمنی، آئرلینڈ، اٹلی اور اسپین — تیسرے نمبر پر ہیں، جنہیں 189 مقامات تک بغیر ویزا رسائی حاصل ہے۔

یو اے ای آٹھویں نمبر پر ہے، جس کا اسکور 184 ہے، اور یہ مشرق وسطیٰ کا واحد ملک ہے جو ٹاپ 10 میں شامل ہے۔ یو اے ای گزشتہ 10 برسوں میں 42ویں سے آٹھویں نمبر پر پہنچ کر سب سے نمایاں ترقی کرنے والا ملک رہا ہے۔

گزشتہ ماہ، پاکستان اور یو اے ای نے سفارتی اور سرکاری پاسپورٹس کے لیے ویزا چھوٹ کا معاہدہ کیا تھا۔

ہینلے پاسپورٹ انڈیکس کے بانی ڈاکٹر کرسچن ایچ کیلن نے کہا کہ تازہ ترین رپورٹ عالمی نقل و حرکت کے میدان میں بڑھتی ہوئی مسابقتی صورتحال کو ظاہر کرتی ہے۔ سب سے اوپر نظر آنے والا ارتکاز اس بات پر زور دیتا ہے کہ رسائی حاصل کی جاتی ہے — اور اسے فعال اور حکمتِ عملی سے سفارتکاری کے ذریعے برقرار رکھنا ضروری ہے۔

انہوں نے منگل کو ہینلے کی جانب سے جاری کردہ پریس ریلیز میں کہا کہ وہ ممالک جو فعال طور پر ویزا چھوٹ پر بات چیت کرتے ہیں اور باہمی معاہدوں کی پرورش کرتے ہیں، ترقی کرتے رہتے ہیں، جب کہ جو اس عمل میں کم سرگرم ہوتے ہیں، وہ پیچھے رہ جاتے ہیں۔

اہم تبدیلیاں برطانیہ اور امریکہ دونوں نے جنوری سے عالمی پاسپورٹ رینکنگ میں ایک ایک درجہ کھویا ہے، جو طویل مدتی گراوٹ کا تسلسل ہے۔

کبھی دنیا کے سب سے طاقتور پاسپورٹ رکھنے والے ممالک — برطانیہ 2015 میں اور امریکہ 2014 میں — اب بالترتیب چھٹے اور دسویں نمبر پر ہیں۔

برطانیہ کو فی الحال 186 مقامات تک بغیر ویزا رسائی حاصل ہے، جب کہ امریکہ 182 مقامات کے ساتھ پیچھے ہے۔ قابلِ ذکر ہے کہ امریکہ اب پہلی بار انڈیکس کی 20 سالہ تاریخ میں ٹاپ 10 سے باہر ہونے کے قریب ہے۔

بھارت نے پچھلے چھ ماہ میں رینکنگ میں سب سے بڑی چھلانگ لگائی ہے، آٹھ درجے بڑھ کر 85ویں سے 77ویں نمبر پر پہنچا ہے، جب کہ سعودی عرب نے ویزا فری رسائی میں سب سے زیادہ اضافہ کیا ہے، جنوری سے چار نئے مقامات شامل کر کے اپنی کل تعداد 91 کر لی ہے اور اپنی پوزیشن چار درجے بہتر بنا کر 54ویں نمبر پر پہنچائی ہے۔