11 جولائی کو سرکاری ادارے ٹی سی پی نے 3 لاکھ میٹرک ٹن چینی کی درآمد کے لیے ٹینڈر جاری کیا تھا جس میں بولیاں 18 جولائی 2025 تک جمع کروائی جا سکتی تھیں۔ تاہم حالیہ پیش رفت کے تحت ٹی سی پی نے ایک کوریجنڈم جاری کیا ہے جس میں درآمدی مقدار میں کمی، مخصوص شرائط میں تبدیلی اور ٹینڈر کھولنے کی تاریخ میں توسیع کی گئی ہے۔

اب ٹینڈر کے مطابق چینی کی درآمد کی مقدار 50 ہزار میٹرک ٹن ہوگی، جو کہ پہلے 3 لاکھ میٹرک ٹن مقرر کی گئی تھی۔ ٹی سی پی کی جانب سے جاری کردہ کوریجنڈم میں کہا گیا ہے کہ 300,000 میٹرک ٹن کی عبارت کو اب ”50,000 میٹرک ٹن“ کے طور پر پڑھا جائے۔

اس کے علاوہ ٹینڈر کھولنے کی تاریخ میں چار دن کی توسیع کر دی گئی ہے۔ اب ٹینڈر 22 جولائی 2025 کو کھولا جائے گا، جبکہ پہلے یہ تاریخ 18 جولائی 2025 مقرر کی گئی تھی۔ کوریجنڈم میں کہا گیا ہے کہ پیراگراف نمبر 2 اور 4 میں درج 18 جولائی 2025 کو اب 22 جولائی 2025 کے طور پر پڑھا جائے۔

ٹینڈر میں گریڈ سے متعلق بھی ترمیم کی گئی ہے۔ پہلے صرف میڈیم گریڈ چینی کی بولیاں طلب کی گئی تھیں، جبکہ اب بولی دہندگان ”اسمال (فائن)“ اور ”میڈیم گریڈ“ چینی دونوں کے لیے بولی دے سکتے ہیں۔

مارکیٹ ذرائع کا کہنا ہے کہ ٹی سی پی کے اس ٹینڈر میں تبدیلی بین الاقوامی مالیاتی فنڈ (آئی ایم ایف) کی جانب سے چینی کی درآمد پر دی گئی ٹیکس چھوٹ پر اٹھائے گئے تحفظات کے جواب میں کی گئی ہے۔ آئی ایم ایف کو خدشہ ہے کہ یہ چھوٹ پاکستان کے 7 ارب ڈالر کے قرض پروگرام پر منفی اثر ڈال سکتی ہے۔ تاہم حکومتی سطح پر آئی ایم ایف کے تحفظات کی کوئی باضابطہ تصدیق نہیں ہوئی۔

ذرائع کے مطابق چینی کی یہ درآمد مقامی مارکیٹ میں چینی کی فراہمی میں بہتری کا باعث بنے گی، اور ممکنہ طور پر قیمتوں میں استحکام آئے گا۔ یاد رہے کہ چینی کی بڑھتی ہوئی قیمتوں پر قابو پانے اور ممکنہ قلت سے بچنے کے لیے وفاقی حکومت نے 5 لاکھ میٹرک ٹن چینی درآمد کرنے کا فیصلہ کیا ہے۔

اسی سلسلے میں فیڈرل بورڈ آف ریونیو (ایف بی آر) نے چینی کی درآمد پر کسٹمز ڈیوٹی سے استثنیٰ دیا ہے، جبکہ سیلز ٹیکس کی شرح 18 فیصد سے کم کر کے 0.25 فیصد کر دی گئی ہے، اور ٹی سی پی یا نجی شعبے کے ذریعے درآمد پر ودہولڈنگ ٹیکس بھی 0.25 فیصد تک کم کر دیا گیا ہے۔

کاپی رائٹ بزنس ریکارڈر، 2025