محمد اورنگزیب نے پاکستان کی معیشت میں استحکام سے متعلق پیش رفت کو اجاگر کرتے ہوئے بتایا کہ مہنگائی میں نمایاں کمی، پالیسی ریٹ میں کمی، کرنسی ریٹ کا استحکام، کرنٹ اکاؤنٹ سرپلس اور زرمبادلہ کے ذخائر میں نمایاں اضافہ دیکھا گیا ہے، جو جون کے آخر تک 14 ارب ڈالر سے تجاوز کر چکے ہیں۔

وزارت خزانہ کے جاری کردہ بیان کے مطابق ترسیلات زر میں بہتری اور برآمدات کی کارکردگی میں اضافہ پاکستان کی معاشی بحالی اور سرمایہ کاروں کے اعتماد کی علامت کے طور پر پیش کیے گئے۔

اس تفصیلی اجلاس میں وزیر خزانہ نے موڈیز ٹیم کو آگاہ کیا کہ پاکستان نے معیشت کے استحکام کے لیے اہم پیش رفت کی ہے اور پائیدار اور جامع ترقی کی بنیاد رکھی جا رہی ہے۔ انہوں نے آئی ایم ایف کے اسٹینڈ بائی پروگرام کے تحت حتمی ریویو کی کامیاب تکمیل، دوسری قسط کی ادائیگی اور ریزیلینس اینڈ سسٹین ایبلٹی فیسیلٹی (آر ایس ایف) میں پیش رفت کو پاکستان کی معاشی حکمت عملی پر عالمی اعتماد کی بحالی کے اہم سنگ میل قرار دیا۔

انہوں نے حکومت کی جانب سے کی گئی ساختی اصلاحات پر بھی روشنی ڈالی جن میں حالیہ بجٹ میں مالیاتی اقدامات، تجارتی اور ٹیرف اصلاحات، اور سرکاری اخراجات میں نظم و ضبط شامل ہیں، جن کا مقصد برآمدات پر مبنی معیشت کو فروغ دینا ہے۔

اجلاس میں امریکہ کے ساتھ جاری مذاکرات کا ذکر بھی کیا گیا جن کا مقصد پاکستانی مصنوعات کو ترجیحی ٹیرف رسائی دینا ہے اور ان مذاکرات میں حوصلہ افزا پیش رفت ہو رہی ہے۔

مزید بتایا گیا کہ پاکستان نے بین الاقوامی مالیاتی منڈیوں سے دوبارہ روابط استوار کرنے کے لیے اقدامات کیے ہیں جن میں مشرق وسطیٰ سے 1 ارب ڈالر کی کمرشل فنانسنگ، پہلے پانڈا بانڈ کے اجراء کی منصوبہ بندی، اور یوروبانڈ سمیت دیگر عالمی قرض مارکیٹوں میں رسائی کا ارادہ شامل ہے، جیسے جیسے پاکستان کی کریڈٹ ریٹنگ بہتر ہو رہی ہے۔

بیان کے مطابق، موڈیز ٹیم کو پاکستان کے اصلاحاتی سفر کی مکمل تفصیلات فراہم کی گئیں، خاص طور پر ٹیکس ٹو جی ڈی پی تناسب بڑھانے کے لیے ٹیکنالوجی پر مبنی ٹیکس اصلاحات، نظام کی ڈیجیٹلائزیشن، اور سخت نفاذی اقدامات پر زور دیا گیا۔

محمد اورنگزیب نے واضح کیا کہ حکومت ٹیکس نیٹ میں توسیع، چوری کی روک تھام اور ٹیکس کی مکمل ادائیگی کو یقینی بنانے کے لیے مؤثر اقدامات کر رہی ہے۔ انہوں نے بتایا کہ رواں مالی سال میں حاصل ہونے والا 2 کھرب روپے کا اضافی ریونیو مکمل طور پر مقامی کوششوں کا نتیجہ ہے اور حکومت آئندہ چند برسوں میں ٹیکس ٹو جی ڈی پی تناسب کو 13 سے 13.5 فیصد تک پہنچانے کے لیے پرعزم ہے۔

وزیر خزانہ نے موڈیز ٹیم کے سوالات کے جواب بھی دیے اور پاکستان کے میکرو اکنامک اصلاحات، نجکاری، ریاستی اداروں کی تنظیم نو اور سرکاری شعبے کے حجم کو مناسب بنانے کے عزم کا اعادہ کیا۔

آخر میں انہوں نے اس امید کا اظہار کیا کہ پاکستان کے بہتر ہوتے معاشی اشاریے اور جاری اصلاحاتی پیش رفت کو ریٹنگ ایجنسیز مثبت انداز میں تسلیم کریں گی، جس سے نہ صرف پاکستان کی بین الاقوامی منڈیوں تک رسائی بڑھے گی بلکہ بیرونی شعبے کا استحکام بھی مضبوط ہوگا۔