برینٹ کروڈ فیوچرز کی قیمت 15 سینٹ بڑھ کر 70.51 ڈالر فی بیرل ہو گئی جو جمعہ کو 2.51 فیصد اضافے کے تسلسل کا اظہار ہے۔ امریکی ویسٹ ٹیکساس انٹرمیڈیٹ کروڈ فیوچرز 14 سینٹ اضافے کے بعد 68.59 ڈالر تک پہنچ گئیں جو پچھلے سیشن میں 2.82 فیصد اضافے کے ساتھ بند ہوئی تھیں۔

امریکی صدر ڈونلڈ ٹرمپ نے اتوار کو کہا کہ وہ یوکرین کو پیٹریاٹ ایئر ڈیفنس میزائل بھیجیں گے۔ یاد رہے کہ صدر ٹرمپ پیر (آج) کو روس سے متعلق ایک اہم بیان دینے والے ہیں۔

صدر ٹرمپ نے یوکرین میں جنگ کے خاتمے میں پیشرفت نہ ہونے اور یوکرینی شہروں پر روس کی بڑھتی بمباری پر روسی صدر ولادیمیر پیوٹن پر ناراضگی کا اظہار کیا ۔

یوکرین کے ساتھ نیک نیتی پر مبنی امن مذاکرات پر ماسکو پر دباؤ ڈالنے کے لیے ایک دو جماعتی امریکی بل جو روس پر پابندیاں عائد کرنے کا مطالبہ کرتا ہے، گزشتہ ہفتے کانگریس میں تیزی سے مقبول ہوا تاہم اسے اب بھی صدر ٹرمپ کی حمایت کا انتظار ہے۔

یورپی یونین کے سفارتکار روس کے خلاف 18ویں پابندیوں کے پیکیج پر متفق ہونے کے قریب ہیں جس میں روسی تیل پر قیمت کی حد مزید کم کرنے کی شق بھی شامل ہوگی۔ یہ بات چار یورپی یونین ذرائع نے اتوار کو ہونے والی ایک ملاقات کے بعد بتائی۔

گزشتہ ہفتے برینٹ کی قیمت میں 3 فیصد اضافہ ہوا، جبکہ ڈبلیو ٹی آئی نے تقریباً 2.2 فیصد ہفتہ وار اضافہ ریکارڈ کیا۔ یہ اضافہ اس وقت دیکھنے میں آیا جب بین الاقوامی توانائی ایجنسی نے کہا کہ عالمی تیل مارکیٹ بظاہر جتنی نظر آتی ہے اس سے کہیں زیادہ سخت ہو سکتی ہے، کیونکہ گرمیوں کے عروج پر ریفائنریوں کی مکمل استعداد پر پیداواری سرگرمیوں اور سفر و بجلی کی طلب سے طلب کو سہارا مل رہا ہے۔

تاہم اے این زیڈ کے تجزیہ کاروں نے کہا کہ قیمتوں میں اضافے کو محدود کردیا گیا کیونکہ اعدادوشمار سے ظاہر ہوا ہے کہ سعودی عرب نے تیل کی پیداوار کو تیل برآمد کرنے والے ممالک کی تنظیم (اوپیک) اور اس کے اتحادیوں کے سپلائی معاہدے میں طے شدہ کوٹے سے تجاوز کرتے ہوئے بڑھا دیا ہے۔

بین الاقوامی توانائی ایجنسی کے مطابق سعودی عرب نے جون میں اپنا تیل پیداوار ہدف 4 لاکھ 30 ہزار بیرل یومیہ سے تجاوز کردیا ہے جس کے بعد مجموعی پیداوار 98 لاکھ بیرل یومیہ تک پہنچ گئی جبکہ سعودی عرب کا اوپیک پلس کے تحت مقررہ ہدف 93 لاکھ 70 ہزار بیرل یومیہ تھا۔

سعودی عرب کی وزارتِ توانائی نے جمعہ کو کہا کہ وہ اپنی رضاکارانہ اوپیک پلس پیداوار کے ہدف کی مکمل پاسداری کررہا ہے۔ وزارت نے مزید بتایا کہ جون میں سعودی عرب کی مارکیٹ کی جانے والی خام تیل کی سپلائی 93 لاکھ 52 ہزار بیرل یومیہ رہی، جو طے شدہ کوٹے کے مطابق ہے۔

دوسری جانب، چین کی جون میں تیل کی درآمدات سالانہ 7.4 فیصد بڑھ کر 4 کروڑ 98 لاکھ 90 ہزار ٹن تک پہنچ گئیں جو یومیہ 1 کروڑ 21 لاکھ 40 ہزار بیرل کے برابر ہے۔ پیر کو جاری کردہ کسٹمز کے اعداد و شمار کے مطابق، یہ یومیہ شرح اگست 2023 کے بعد سب سے زیادہ ہے۔