مارکو روبیو اپنی وزارت سنبھالنے کے بعد پہلی بار ایشیا کے دورے پر ہیں جہاں وہ ایسٹ ایشیا سمٹ اور آسیان ریجنل فورم میں شرکت کر رہے ہیں۔ ان اجلاسوں میں جاپان، چین، جنوبی کوریا، روس، بھارت، آسٹریلیا، یورپی یونین اور جنوب مشرقی ایشیائی ریاستوں کے وزرائے خارجہ بھی شریک ہیں۔

روبیو کی آمد ایسے وقت پر ہوئی ہے جب صدر ڈونلڈ ٹرمپ کی حکومت نے ایشیائی ممالک پر بھاری ٹیرف عائد کرنے کا اعلان کیا ہے۔ جاپان، جنوبی کوریا اور ملائیشیا پر 25 فیصد، انڈونیشیا پر 32 فیصد، تھائی لینڈ اور کمبوڈیا پر 36 فیصد، جبکہ میانمار اور لاؤس پر 40 فیصد۔ چین پہلے ہی 100 فیصد سے زائد ٹیرف کا سامنا کر رہا ہے اور اگر 12 اگست تک معاہدہ نہ ہوا تو اضافی پابندیاں بحال ہو سکتی ہیں۔

چینی وزیر خارجہ وانگ ای نے کوالالمپور میں امریکی اقدامات کو شدید تنقید کا نشانہ بنایا۔ انہوں نے کہا کہ یہ یکطرفہ غنڈہ گردی ہے جسے کوئی بھی ملک تسلیم نہیں کرے گا۔ وانگ نے تھائی اور کمبوڈیائی وزرائے خارجہ کو بتایا کہ امریکی ٹیرف عالمی تجارتی نظام، پیداوار اور سپلائی چین کی سلامتی کو نقصان پہنچا رہے ہیں۔

اس دوران امریکی وزیر خارجہ روبیو نے جاپانی وزیر خارجہ اور جنوبی کوریا کے نائب وزیر خارجہ کے ساتھ سہ فریقی ملاقات کی جس میں خطے کی سلامتی، تکنیکی تعاون، توانائی، ڈیجیٹل انفراسٹرکچر اور شپ بلڈنگ میں شراکت پر بات چیت ہوئی۔

روبیو نے عندیہ دیا ہے کہ وہ وانگ ای سے ملاقات میں چین کی روس کے ساتھ جنگی تعاون پر بھی امریکی خدشات اٹھائیں گے۔ انہوں نے کہا کہ چین روس کو بلاواسطہ مدد فراہم کر رہا ہے اور خود کو واضح طور پر بچا رہا ہے۔

تجزیہ کاروں کے مطابق، روبیو کا دورہ انڈو پیسفک خطے پر امریکی توجہ کی تجدید اور چین کے مقابلے میں امریکہ کو بہتر شراکت دار ثابت کرنے کی کوشش ہے۔