یہ پیش رفت بدھ کے روز وزارت خارجہ میں ترک وزیر خارجہ ہاکان فدان اور وزیر دفاع یاسر گلر کے ساتھ اسحاق ڈار کی ملاقات کے دوران سامنے آئی۔

پاکستان اور ترکی نے اس بات پر بھی اتفاق کیا کہ دونوں برادر ممالک خطے میں امن و استحکام کے فروغ کے لیے تعاون کو مزید وسعت دیں گے اور غزہ تنازع کے فوری حل کے لیے مشترکہ کوششیں کریں گے۔

وزارت خارجہ میں مشترکہ پریس کانفرنس سے خطاب کرتے ہوئے اسحاق ڈار نے کہا کہ سیکیورٹی، دفاع اور انٹیلی جنس پر مشترکہ کمیٹی کا پہلا اجلاس 24 جولائی کو اسلام آباد میں منعقد ہوگا، جب کہ دفاعی صنعت کی کمیٹی کا اجلاس ستمبر میں متوقع ہے۔ انہوں نے ترکی کی دفاعی صنعت میں 20 فیصد سے 80 فیصد تک مقامی پیداواری شرح کے اضافے کو سراہا۔

اسحاق ڈار نے خواہش ظاہر کی کہ پاکستان، دفاع اور سلامتی کے شعبوں میں ترکی کے تجربات اور مہارت سے استفادہ کرنا چاہے گا۔

انہوں نے بتایا کہ ٹرانسپورٹ اور کمیونیکیشنز پر کمیٹی کا اجلاس آئندہ ہفتے متوقع ہے۔

اسحاق ڈار نے استنبول-تہران-اسلام آباد ٹرین منصوبے کی بحالی کا بھی اعلان کیا تاکہ تینوں دوست ممالک کے درمیان تجارتی و اقتصادی سرگرمیوں کو فروغ دیا جا سکے۔ اس منصوبے کی بحالی کے لیے پاکستان اور ترکی کے وفود آئندہ چند ہفتوں میں روڈمیپ کو حتمی شکل دیں گے۔

مزید برآں اسحاق ڈار نے انکشاف کیا کہ ترک کمپنیاں پاکستان میں جناح میڈیکل کمپلیکس اور دانش یونیورسٹی جیسے بڑے منصوبوں میں حصہ لیں گی اور وہ آف شور ڈرلنگ کے شعبے میں بھی سرمایہ کاری کریں گی۔ ترک کمپنیاں ڈسٹری بیوشن کمپنیز (ڈسکوز) کی نجکاری میں بھی شریک ہوں گی۔

دونوں ممالک نے دہشت گردی کے خلاف اقدامات اور پاکستان کی سیکیورٹی فورسز کی تربیت کے حوالے سے تعاون پر بھی تبادلہ خیال کیا۔

ترک وزیر خارجہ ہاکان فدان نے میڈیا سے گفتگو میں کہا کہ دونوں ممالک نے معیشت، توانائی، دفاع، صنعت، تعلیم اور ثقافت کے شعبوں میں اپنے تعلقات کو وسعت دی ہے۔ انہوں نے کہا کہ ترکی اور پاکستان تجارتی حجم کو پانچ ارب ڈالر تک لے جانے کے خواہاں ہیں۔

انہوں نے کہا کہ دفاعی صنعت میں تعاون کو مزید مضبوط کیا جائے گا کیونکہ یہ دونوں ممالک کی سلامتی کے لیے نہایت اہم اور اسٹریٹجک قدم ہے۔

کاپی رائٹ بزنس ریکارڈر، 2025