اس سیشن میں میٹا کے پالیسی ماہرین (فیس بک، انسٹاگرام اور واٹس ایپ) کے علاوہ اہم سرکاری اداروں اور قانون نافذ کرنے والے اداروں (ایل ای ایز) کے نمائندے بھی شریک ہوئے۔

شرکاء کے درمیان گفتگو کا محور درج ذیل نکات رہے: دہشت گردی سے متعلق مواد کے خلاف میٹا کی تازہ ترین پالیسیوں پر تبادلہ خیال

ریاستی اداروں اور ڈیجیٹل پلیٹ فارمز کے درمیان بہتر رابطہ کاری کا قیام

شکایات کے ازالے کے عمل کو مزید مؤثر اور تیز بنانے پر تجاویز

ورکشاپ کے اختتام پر ایک سوال و جواب کا خصوصی سیشن بھی رکھا گیا، جس میں شرکاء نے میٹا کے پالیسی ماہرین سے براہِ راست سوالات کیے۔

ورکشاپ سے خطاب کرتے ہوئے چیئرمین پاکستان ٹیلی کمیونیکیشن اتھارٹی (پی ٹی اے) میجر جنرل (ر) حفیظ الرحمٰن نے آن لائن پلیٹ فارمز کے غلط استعمال کو روکنے کے لیے ادارہ جاتی اشتراک اور تعاون کی اہمیت پر زور دیا۔

انہوں نے کہا کہ میٹا جیسے عالمی پلیٹ فارمز سے رابطہ اور شراکت ڈیجیٹل ماحولیاتی نظام کو انتہاپسندی سے محفوظ بنانے کے لیے نہایت ضروری ہے۔

میٹا کی جانب سے ”خطرناک تنظیمات اور افراد (ڈی او آئی)“ کی پالیسی کے سربراہ ڈاکٹر نواب عثمان نے بھی پی ٹی اے کی خدمات کو سراہا۔

ان کا کہنا تھا کہ اس نوعیت کی مشترکہ کاوشیں محفوظ ڈیجیٹل ماحول کے قیام کے لیے ناگزیر ہیں، جو نہ صرف کمیونٹی اسٹینڈرڈز بلکہ بنیادی انسانی حقوق کا بھی احترام کرتی ہیں۔

ورکشاپ کا انعقاد ذمہ دارانہ ڈیجیٹل طرزِ عمل کے فروغ اور قومی سائبر تحفظ کو مضبوط بنانے کے لیے پی ٹی اے کی وسیع تر مہم کا حصہ ہے۔