واشنگٹن کی جانب سے اسرائیل کے ایران پر حملوں میں شامل ہونے کے فیصلے نے ان خدشات کو جنم دیا ہے کہ ایران جوابی کارروائی کے طور پر آبنائے ہرمز کو بند کر سکتا ہے — وہ راستہ جس سے دنیا کی لگ بھگ 20 فیصد تیل اور گیس کی طلب گزرتی ہے۔

اسی تناظر میں تیل کی قیمتوں کے 100 ڈالر فی بیرل تک پہنچنے کی پیش گوئیاں بھی کی جا رہی ہیں۔

صنعتی ذرائع کا کہنا ہے کہ خلل پہلے ہی نمایاں ہے، کیونکہ ٹینکر اب آبنائے ہرمز میں ضرورت سے زیادہ وقت گزارنے سے گریز کر رہے ہیں۔

سنگاپور کی کمپنی سینتوسا شپ بروکرز کے مطابق گزشتہ ایک ہفتے میں خلیج میں داخل ہونے والے خالی ٹینکروں کی تعداد 32 فیصد جبکہ روانہ ہونے والے بھری ہوئی ٹینکروں کی تعداد مئی کے آغاز کے مقابلے میں 27 فیصد کم ہو چکی ہے۔

کوس وِزڈم لیک نامی ایک بہت بڑا خام تیل بردار ٹینکر (وی ایل سی سی) اتوار کو آبنائے ہرمز پہنچا لیکن پھر یوٹرن لے کر جنوب کی سمت روانہ ہو گیا، جیسا کہ کیپلر اور ایل ایس ای جی کے ڈیٹا میں دیکھا گیا۔ پیر کے روز اس نے دوبارہ اپنا راستہ بدلا اور متحدہ عرب امارات کی بندرگاہ زِرکو کی طرف سفر بحال کر دیا۔

اسی طرح ساوتھ لائلٹی نامی ایک اور وی ایل سی سی نے بھی یوٹرن لیا اور پیر کو آبنائے ہرمز سے باہر ہی موجود رہا، ایل ایس ای جی کے اعداد و شمار کے مطابق۔ کیپلر اور دو شپنگ ذرائع کے مطابق یہ جہاز عراق کے بصرہ ٹرمینل سے خام تیل لادنے کے لیے شیڈول تھا۔ امریکہ نے چین پر زور دیا ہے کہ وہ ایران کو آبنائے ہرمز بند کرنے سے باز رکھنے میں کردار ادا کرے۔

کوس وِزڈم لیک ٹینکر کو زِرکو (متحدہ عرب امارات) سے خام تیل لاد کر چین پہنچانا تھا۔ ایل ایس ای جی اور کیپلر کے ڈیٹا کے مطابق، یہ جہاز یونی پیک (چینی سرکاری کمپنی سائنوپیک کے تجارتی بازو) نے کرائے پر لیا تھا۔

سائنوپیک نے اس معاملے پر تبصرے کی درخواست کا فوری طور پر کوئی جواب نہیں دیا۔

غیر ضروری قیام نہیں ہوگا

تائیوان کی فارموسا پیٹروکیمیکل کارپوریشن کے ترجمان کے وائی لِن نے پیر کو کہا کہ تنازع کے باعث جہاز مالکان آبنائے ہرمز میں اپنے جہازوں کے قیام کے وقت کو کم سے کم رکھنے کی کوشش کریں گے۔

ان کا کہنا تھا کہ جہاز صرف اس وقت خطے میں داخل ہوں گے جب اُن کے لادنے کا وقت قریب ہوگا۔

جاپانی شپنگ کمپنیوں نپون یوسن اور مِتسُوئی او ایس کے لائنز نے بھی پیر کو کہا کہ وہ آبنائے ہرمز سے آمد و رفت جاری رکھے ہوئے ہیں، تاہم اپنے جہازوں کو ہدایت دی گئی ہے کہ خلیج میں قیام کم سے کم رکھا جائے۔

متعدد آئل ٹریڈرز اور تجزیہ کاروں نے رائٹرز کو بتایا کہ انہیں متنبہ کیا گیا ہے کہ بحری جہازوں کو آبنائے ہرمز کے باہر اپنی باری کے انتظار میں تاخیر کا سامنا ہو سکتا ہے، جس کے باعث شپنگ میں خلل متوقع ہے۔

ایران کی پریس ٹی وی کے مطابق ایرانی پارلیمنٹ نے اتوار کے روز ایک ایسی قرارداد کی منظوری دی ہے جس میں آبنائے ہرمز کو بند کرنے کی تجویز دی گئی ہے، تاہم اس پر عمل درآمد کے لیے سپریم نیشنل سیکیورٹی کونسل کی منظوری درکار ہوگی۔

ایران ماضی میں بھی آبنائے ہرمز کو بند کرنے کی دھمکیاں دے چکا ہے، لیکن اس حوالے سے کبھی عملی اقدام نہیں کیا۔