وزیراعظم شہباز شریف کی صدارت میں ہونے والے اس اعلیٰ سطح کے اجلاس میں 22 جون کو ایرانی جوہری مراکز فردو، نطنز اور اصفہان پر اسرائیلی حملوں کے بعد ابھرتے ہوئے علاقائی حالات کا جائزہ لیا گیا۔

این ایس سی نے افسوس کا اظہار کیا کہ یہ حملے ایران اور امریکہ کے درمیان تعمیری مذاکراتی عمل کے دوران ہوئے، اور اسرائیل کی کارروائیوں کو ”غیر ذمے دارانہ“ اور ”کشیدگی میں اضافے والی“ قرار دیا ہے۔

کمیٹی نے بیان میں کہا ہے کہ “یہ غیر ذمے دارانہ اقدامات کشیدگی کو بڑھا چکے ہیں، جو وسیع تر تنازع کو ہوا دے سکتے ہیں اور بات چیت و سفارت کاری کے مواقع کو کمزور کر رہے ہیں۔

این ایس سی نے اقوام متحدہ کے چارٹر کے تحت ایران کے اپنے دفاع کے حق کی بھرپور حمایت کی اوربیگناہ جانوں کے نقصان پر ایرانی حکومت اور عوام سے تعزیت کا اظہار کیا۔ اس کے علاوہ حملوں میں زخمی ہونے والوں کی جلد صحت یابی کے لیے دعا بھی کی۔

این ایس سی نے اسرائیلی حملوں کو بین الاقوامی جوہری توانائی ایجنسی (آئی اے ای اے) کی قراردادوں، بین الاقوامی قانون اور اقوام متحدہ کے چارٹر کی خلاف ورزی قرار دیا اور خطے میں کشیدگی کے مزید بڑھنے پر گہری تشویش کا اظہار کیا۔

کمیٹی نے پاکستان کے علاقائی امن و استحکام کے عزم کو دہرایا اور بات چیت و سفارت کاری کی اہمیت پر زور دیا۔ اس نے متعلقہ فریقوں کے ساتھ مشاورت اور کشیدگی کم کرنے کی کوششوں کی حمایت کے لیے اسلام آباد کی آمادگی بھی ظاہر کی۔

بیان میں مزید کہا گیا ہے کہ کمیٹی نے بین الاقوامی انسانی حقوق اور انسانی ہمدردی کے قوانین کی مکمل پاسداری کی ضرورت پر زور دیا۔

قومی سلامتی کمیٹی پاکستان کا اعلیٰ ترین فیصلہ سازی فورم ہے جو قومی سلامتی اور خارجہ پالیسی کے امور پر نظر رکھتا ہے اور اس میں سینئر سول و فوجی قیادت شامل ہوتی ہے۔