حکومت اور اناملی کمیٹی کو بھیجے گئے اپنے پیغام میں چیئرمین پی وائے ایم اے نے زور دیا کہ شفافیت، مسابقت اور ملکی ٹیکسٹائل صنعت کی طویل المدتی پائیداری میں رکاوٹ بننے والے اہم مسائل کو فوری حل کیا جائے۔ انہوں نے نشاندہی کی کہ بجٹ میں کمرشل اور انڈسٹریل درآمدات کے درمیان پالیسی تفریق واضح نہیں کی گئی۔ صنعتی درآمدات پر صرف 1 فیصد انکم ٹیکس عائد ہوتا ہے، جبکہ کمرشل درآمدات پر شرحِ ٹیکس نمایاں طور پر زیادہ یعنی 3.5 فیصد ہے۔

انہوں نے کہا کہ ہمارے حساب کے مطابق صنعتی اور کمرشل درآمدات کے درمیان مجموعی ڈیوٹی کا فرق تقریباً 5.5 فیصد بنتا ہے جس میں سیلز ٹیکس ویلیو ایڈیشن بھی شامل ہے۔ یہ تفاوت نہ صرف انتظامی پیچیدگیوں کو جنم دیتی ہے بلکہ مارکیٹ میں غیر فطری بگاڑ کا باعث بھی بنتی ہے۔ انہوں نے زور دے کر کہا کہ ماضی میں ہونے والی مشاورت میں یہ متفقہ توقع قائم ہوئی تھی کہ دونوں شعبوں کے ساتھ مساوی سلوک کیا جائے گا۔

ثاقب گڈ لک نے اس بات پر زور دیا کہ پولیسٹر سے بنی ڈرا ٹیکسچرڈ یارن (ڈی وائے ٹی) (ایچ ایس کوڈ: 5402.3300) پر پہلے ہی 13.84 فیصد اوسط اینٹی ڈمپنگ ڈیوٹی عائد ہے، جو نیشنل ٹریڈنگ کمیشن نے 17 جون 2025 کو نافذ کی تھی۔ ملکی صنعت کو پہلے سے حاصل اس حفاظتی اقدام کے تناظر میں پی وائے ایم اے کا مؤقف ہے کہ ڈی ٹی وائے پر کسی بھی اضافی ریگولیٹری ڈیوٹی کا نفاذ یا برقرار رکھنا غیر مناسب ہے۔ پی وائے ایم اے پُرزور سفارش کرتا ہے کہ ڈی ٹی وائے پر ریگولیٹری ڈیوٹی کو صفر فیصد کر دیا جائے۔

کسٹمز ڈیوٹی سے متعلق گفتگو میں پی وائے ایم اے کے چیئرمین نے اس ساختی عدم توازن کی نشاندہی کی جس کے تحت خام مال (پی ایف وائے) اور گرے فیبرکس دونوں پر 10 فیصد ڈیوٹی عائد ہے جبکہ بلیچ یا فائنل پراڈکٹس پر 15 فیصد ڈیوٹی لاگو ہوتی ہے۔ یہ کیسکیڈنگ ڈیوٹی اسٹرکچر بنیادی شعبوں جیسے بنائی، بُناوَٹ، ٹوئسٹنگ اور فنشنگ پر غیر متناسب بوجھ ڈالتا ہے، جو خاص طور پر چھوٹے اور درمیانے درجے کے کاروبار کو متاثر کرتا ہے۔ پی وائے ایم اے نے حکومت سے مطالبہ کیا کہ وہ تمام اقسام کے فیبرکس (فنشڈ، نیم تیار اور گرے فیبرکس، جن پر اس وقت 15 فیصد ڈیوٹی عائد ہے) پر ڈیوٹی کو فوری طور پر متوازن بنائے، تاکہ پولیسٹر ویلیو چین کی کیسکیڈنگ کو درست جواز فراہم کیا جا سکے۔