قبل ازیں کوالالمپور، ملائیشیا میں بدھ کے روز کھیلے گئے ایک سنسنی خیز اور کانٹے کے مقابلے میں نیوزی لینڈ نے پاکستان کو 4-3 سے شکست دے دی تھی ۔

پاکستان نے تیسرے کوارٹر کے آغاز میں 3-1 کی برتری حاصل کر رکھی تھی، تاہم نیوزی لینڈ کے اسکاٹ کاسلیٹ نے شاندار کارکردگی دکھاتے ہوئے دو گول کر کے مقابلہ برابر کر دیا۔

فیصلہ کن کوارٹر میں کاسلیٹ نے تیسرا گول کر کے ہیٹ ٹرک مکمل کی اور اپنی ٹیم کو مکمل پوائنٹس دلواتے ہوئے فتح دلائی۔

یہ فتح نیوزی لینڈ کے لیے ایک بڑی کامیابی ہے جبکہ پاکستان کے لیے یہ ایک مایوس کن نتیجہ رہا، خاص طور پر اس مضبوط آغاز کے بعد جو انہوں نے پہلے تین کوارٹرز میں دکھایا تھا۔

میچ کے آغاز میں نک ووڈز نے پہلا گول کر کے نیوزی لینڈ کو سبقت دلائی تاہم پاکستان نے زبردست انداز میں کھیل میں واپسی کی۔

عبدالرحمٰن نے دو شاندار گول کر کے گرین شرٹس کو برتری دلائی جبکہ رانا وحید اشرف نے تیسرا گول کر کے اسکور 3-1 کر دیا۔

دوسرے کوارٹر میں پاکستان کا کھیل مکمل طور پر غالب رہا اور دفاع نے بھی مضبوط کارکردگی دکھائی، مگر تیسرے کوارٹر کے آخری لمحات میں نیوزی لینڈ نے ردِعمل دیتے ہوئے دو گول کیے اور مقابلہ برابر کر دیا۔

یہ میچ نیوزی لینڈ کے لیے ایک شاندار واپسی کی مثال بن گیا جبکہ پاکستان کے لیے یہ ایک مایوس کن لمحہ بن گیا جہاں وہ واضح برتری کے باوجود فتح حاصل نہ کر سکا۔

میچ کے آخری کوارٹر میں دونوں ٹیموں کے درمیان سخت مقابلہ دیکھنے میں آیا، مگر فیصلہ کن لمحات میں اسکاٹ کاسلیٹ نے ایک اور گول کر کے نیوزی لینڈ کو فتح دلوائی اور پاکستان کی پول بی میں پہلی پوزیشن حاصل کرنے کی امیدوں پر پانی پھیر دیا۔

ایونٹ کے آغاز میں پاکستان نے جاپان کے خلاف فتح حاصل کی تھی، جبکہ ملائیشیا کے خلاف میچ برابر رہا۔

تین میچز کے بعد پاکستان کے چار پوائنٹس ہیں اور وہ اس وقت پول بی میں دوسرے نمبر پر ہے اور سیمی فائنل میں رسائی کی دوڑ میں شامل ہے۔

پول بی کا آخری گروپ میچ ملائیشیا اور جاپان کے درمیان کھیلا جائے گا، جو پول کی حتمی درجہ بندی کے لیے فیصلہ کن ثابت ہوگا۔

نیوزی لینڈ سے شکست کے بعد پاکستان کی سیمی فائنل میں رسائی کا انحصار ملائیشیا اور جاپان کے درمیان میچ کے نتیجے پر تھا۔

نتائج پاکستان کے حق میں رہے اور بہتر گول اوسط کی بدولت قومی ٹیم نے ایف آئی ایچ نیشنز کپ کے سیمی فائنل میں جگہ بنا لی۔