تاہم، سب سے پہلے مالی سال 25-2024 کے بجٹ نتائج پر توجہ دینا ضروری ہے۔ اس میں کوئی شک نہیں کہ یہ ایک غیر معمولی طور پر اچھا سال رہا ہے۔ مجموعی بجٹ خسارے کا حجم جی ڈی پی کے 5.6 فیصد کے برابر رہا ہے، جو سال کے آغاز میں مقرر کردہ 5.8 فیصد کے ہدف سے کم ہے۔ ایسا شاذ و نادر ہی ہوتا ہے۔

مزید برآں، مالی سال 24-2023 کے مقابلے میں 25-2024 میں بجٹ خسارے میں جی ڈی پی کے 1.2 فیصد کی بڑی کمی آئی ہے۔ یہ عوامی قرضے کے حجم میں تیز رفتاری سے اضافے کو کم کرے گی۔ اس کے لیے وفاقی اور صوبائی دونوں حکومتوں کی مالیاتی نظم و ضبط کو سراہنا چاہیے۔

سال بھر کے دوران فیڈرل بورڈ آف ریونیو (ایف بی آر) کے محصولات میں ہدف کے مقابلے میں بڑھتے ہوئے خسارے کی نشاندہی کی جاتی رہی۔ تاہم، بالآخر 1070 ارب روپے کی کمی کے باوجود بجٹ خسارہ کا ہدف کس طرح حاصل ہوا؟ اس کی بڑی وجہ کرنٹ اخراجات میں ہدف کے مقابلے میں 800 ارب روپے سے زائد کی کمی ہے، جو بنیادی طور پر قرضوں کی ادائیگی میں زبردست کمی کی وجہ سے ممکن ہوئی، کیونکہ شرح سود میں تیزی سے کمی آئی۔ مزید یہ کہ پی ایس ڈی پی منصوبوں پر اخراجات کو بھی 540 ارب روپے سے زیادہ محدود کیا گیا۔

اب اگلے مالی سال کے بجٹ کی طرف رجوع کرتے ہیں۔ اس سے بھی بہتر مالیاتی نظم و نسق کی امید ہے۔ اس بار بجٹ میں عزم ظاہر کیا گیا ہے کہ مجموعی بجٹ خسارے کو مزید کم کر کے جی ڈی پی کے 3.9 فیصد تک لایا جائے گا۔ اگر یہ ہدف حاصل ہو جاتا ہے تو یہ حالیہ برسوں کے سب سے کم بجٹ خساروں میں شامل ہوگا۔ اسی طرح، پرائمری سرپلس بھی 2 فیصد سے زائد رہنے کا امکان ہے۔

اب بنیادی سوال یہ ہے کہ مالی سال 26-2025 میں اتنا بڑا خسارہ کس طرح کم کیا جائے گا؟ ایف بی آر کے محصولات کا ہدف 14,131 ارب روپے رکھا گیا ہے، جبکہ 25-2024 میں یہ ہدف 11,900 ارب روپے تھا۔ لیکن اب امکان ہے کہ اصل وصولی 11,700 ارب روپے رہے گی، جون 2025 میں بھی قابل ذکر کمی متوقع ہے۔ اس صورت میں محصولات میں درکار اضافہ 20.8 فیصد ہوگا۔

مالی سال 26-2025 کے لیے جی ڈی پی کی شرح نمو کو پرامید انداز میں 12.6 فیصد ظاہر کیا گیا ہے، جس میں 4.2 فیصد حقیقی نمو اور 7.5 فیصد افراطِ زر شامل ہے۔ ایف بی آر محصولات اور جی ڈی پی کے مابین لچک تقریباً 1 ہے، لہٰذا بغیر کسی ٹیکس نظام میں تبدیلی کے، محصولات 12.6 فیصد بڑھ کر 13,170 ارب روپے تک پہنچ سکتے ہیں۔

اس کے باوجود، ہدف سے 961 ارب روپے کا فرق باقی رہ جائے گا۔ یہ فرق صرف بہتر ٹیکس انتظامی اصلاحات اور ٹیکس اقدامات کے ذریعے پورا کیا جا سکتا ہے، جیسے کہ شرحوں میں اضافہ اور مراعات کی کمی۔ تاہم، وزیر خزانہ کی تقریر سے ایسا لگتا ہے کہ اتنے بڑے پیمانے پر اقدامات کا امکان کم ہے۔

نان ٹیکس آمدن مالی سال 26-2025 میں 5 فیصد اضافے کے ساتھ 5,147 ارب روپے تک متوقع ہے۔ تاہم، مالی سال 25-2024 میں نان ٹیکس آمدن میں نمایاں اضافہ اس وجہ سے ہوا کہ اسٹیٹ بینک آف پاکستان کے منافع کی مد میں 2500 ارب روپے حاصل ہوئے، جو شرح سود 22 فیصد ہونے کی وجہ سے ممکن ہوا۔

ایک بڑا حیران کن پہلو یہ ہے کہ مالی سال 26-2025 کے نان ٹیکس محصولات کا تخمینہ اسی 2500 ارب روپے کی بنیاد پر لگایا گیا ہے، حالانکہ شرح سود اب 11 فیصد تک گر چکی ہے، اس لیے یہ آمدن برقرار رہنے کا امکان کم ہے۔

آئی ایم ایف کی 17 مئی کی اسٹاف رپورٹ کے مطابق، مالی سال 26-2025 کے لیے نان ٹیکس آمدن کا تخمینہ 3,685 ارب روپے ہے، جو کہ حکومت کے بجٹ تخمینے سے 1,462 ارب روپے کم ہے، کیونکہ اس میں اسٹیٹ بینک کے منافع کو حقیقت پسندانہ طور پر کم رکھا گیا ہے۔

اسٹیٹ بینک کے منافع میں مبالغہ آرائی کے باعث نان ٹیکس آمدن کے تخمینے کی درستگی پر سوال اٹھتے ہیں، اور اس کی اصلاح کی ضرورت ہے۔ اس کا مطلب یہ ہے کہ مالی سال 26-2025 کے لیے 3.9 فیصد بجٹ خسارے کا ہدف شاید جی ڈی پی کے 1.1 فیصد تک کم دکھایا جا رہا ہے۔

دیگر حیران کن پہلوؤں میں سے ایک پہلو 26-2025 کے لیے وفاقی کرنٹ اخراجات کا تخمینہ ہے، جو 16,286 ارب روپے رکھا گیا ہے۔ یہ مالی سال 25-2024 کے مقابلے میں 102 ارب روپے کم ہے۔ جب کہ افراطِ زر کی شرح 7.5 فیصد ظاہر کی گئی ہے، تو حکومت چلانے کے اخراجات میں نمایاں اضافے کا امکان ہے، اس لیے اخراجات میں یہ کمی غیر حقیقی معلوم ہوتی ہے۔

کرنٹ اخراجات کو محدود کرنے کی بنیاد بنیادی طور پر قرضوں کی ادائیگی میں 738 ارب روپے (یعنی 8.3 فیصد) کی بڑی کمی پر رکھی گئی ہے، جو 25-2024 کے مقابلے میں کم ہے۔ غالباً یہ اندازہ اس توقع پر مبنی ہے کہ 26-2025 میں شرح سود میں مزید نمایاں کمی واقع ہوگی، جو کہ فی الحال ایک غیر یقینی مفروضہ ہے۔

ایک اور مد جس میں اخراجات میں کمی متوقع ہے، وہ سبسڈی ہے، جسے 192 ارب روپے تک محدود کرنے کا ہدف ہے — یعنی 14 فیصد کمی۔ اس رجحان کی بنیاد بھی شاید اس امید پر رکھی گئی ہے کہ بجلی کا شعبہ بہتر کارکردگی دکھائے گا اور سبسڈی میں 154 ارب روپے کی بڑی کمی ممکن ہو سکے گی۔ امید ہے کہ اس کا مطلب بجلی کے ٹیرف میں جارحانہ اضافے کی پالیسی اختیار کرنا نہیں ہوگا۔

مالی سال 26-2025 میں گرانٹس کے لیے مختص رقم کو 167 ارب روپے بڑھا کر 1,928 ارب روپے کر دیا گیا ہے۔ تاہم، اس رقم میں بے نظیر انکم سپورٹ پروگرام (بی آئی ایس پی) کا خرچ بھی شامل ہے، جسے اس سال 124 ارب روپے بڑھایا جا رہا ہے۔ اس کے نتیجے میں دیگر اقسام کی گرانٹس، خصوصاً خصوصی علاقوں کے لیے، کے لیے مالی گنجائش خاصی محدود رہ جائے گی۔

یہ امر تسلیم کرنا ضروری ہے کہ پاکستان اور بھارت کے درمیان ممکنہ کشیدگی کے تناظر میں سیکیورٹی انتظامات کے لیے اضافی وسائل درکار ہوں گے۔ اس تناظر میں دفاعی خدمات کے لیے بجٹ میں 369 ارب روپے کا اضافہ کیا گیا ہے، جو کہ 16.9 فیصد شرح نمو کے برابر ہے۔ اسی طرح ہنگامی صورتحال کے لیے مختص رقم کو بھی بجا طور پر 74 فیصد اضافے کے ساتھ آئندہ برس 389 ارب روپے کر دیا گیا ہے۔

حقیقی مایوسی ترقیاتی اخراجات کے لیے رکھی گئی رقم پر ہے، جو صرف 1,287 ارب روپے ہے۔ اس میں پی ایس ڈی پی منصوبوں پر 1,000 ارب روپے اور صوبائی حکومتوں کو دیے جانے والے قرضے، جو کہ 287 ارب روپے ہیں، شامل ہیں۔

اس سے ظاہر ہوتا ہے کہ وفاقی پی ایس ڈی پی کا حجم جی ڈی پی کا محض 0.8 فیصد ہے، جو کہ اہم انفراسٹرکچر جیسے کہ بجلی کی ترسیل و تقسیم، آبی وسائل اور شاہراہوں پر ترقیاتی اخراجات کے لحاظ سے نہایت کم ہے۔ یاد رہے کہ ایک دہائی قبل وفاقی پی ایس ڈی پی جی ڈی پی کا 2 فیصد سے بھی زیادہ ہوا کرتا تھا۔

ایک نئی ترجیح بھارت کی طرف سے سندھ طاس معاہدے سے یکطرفہ علیحدگی کے بعد سامنے آئی ہے۔ پاکستان کو آئندہ چند برسوں میں اپنے آبی وسائل میں فوری اضافے پر توجہ دینی چاہیے، کیونکہ بھارت کی جانب سے پانی کا رخ موڑنے کے خطرات بڑھ چکے ہیں۔

اس وقت وفاقی پی ایس ڈی پی میں آبی وسائل کے شعبے میں 67 جاری منصوبے ہیں، جن کی کل لاگت 2,440 ارب روپے ہے۔ اس سال ان منصوبوں کے لیے مختص اور خرچ کی جانے والی رقم تقریباً 185 ارب روپے ہے۔ حیران کن بات یہ ہے کہ آئندہ مالی سال میں پانی کے منصوبوں کے لیے یہ رقم گھٹا کر صرف 133 ارب روپے کر دی گئی ہے۔ کم از کم اس مد میں رقم کو ان منصوبوں کی مجموعی لاگت کے 15 فیصد تک بڑھایا جانا چاہیے تھا، جو کہ 366 ارب روپے بنتی ہے۔ اس سے وفاقی پی ایس ڈی پی کا حجم بڑھ کر 1,250 ارب روپے ہو جاتا، جو کہ جی ڈی پی کے تقریباً 1 فیصد کے برابر ہے۔

واضح طور پر، بجٹ خسارے کو جی ڈی پی کے 5.6 فیصد سے گھٹا کر 3.9 فیصد تک لانے کی کوشش بہت سخت ہے۔ اس ہدف میں نرمی لا کر خسارے کو جی ڈی پی کے 4.5 فیصد تک رکھا جا سکتا ہے، جو اب بھی آئی ایم ایف کے 5.1 فیصد کے تخمینے سے کم ہوگا۔ جی ڈی پی کے 0.6 فیصد یعنی 775 ارب روپے کی اضافی مالی گنجائش کو استعمال کر کے پی ایس ڈی پی کو 400 ارب روپے اور بی آئی ایس پی کو 375 ارب روپے تک بڑھایا جا سکتا ہے۔

مجموعی طور پر دیکھا جائے تو 26-2025 کا وفاقی بجٹ غیر معمولی حد تک ”سکڑنے والی“ نوعیت کا ہے۔ اس میں خسارے کو بہت زیادہ کم کرنے کا ہدف رکھا گیا ہے۔ ایف بی آر کے محصولات کے ہدف کو حاصل کرنے کے لیے بھی ٹیکس اقدامات اور مضبوط نفاذ سے حاصل ہونے والی آمدنی کی تفصیلی وضاحت درکار ہے۔ مزید مالی گنجائش پیدا کر کے آبی وسائل کے منصوبوں اور بے نظیر انکم سپورٹ پروگرام پر زیادہ اخراجات کیے جانے چاہئیں۔

(مصنف بی این یو میں پروفیسر ایمریٹس اور سابق وفاقی وزیر ہیں)

کاپی رائٹ بزنس ریکارڈر، 2025