وزیراعلیٰ سندھ سید مراد علی شاہ نے مالی سال 2025-26 کے بجٹ خطاب میں کہا کہ ٹیکس نظام کو آسان بنانے اور افراد و کاروباری اداروں پر مالی بوجھ کم کرنے کے لیے بعض اہم تبدیلیوں کی منصوبہ بندی کی جارہی ہے۔

وزیراعلیٰ نے بتایا کہ سروسز پر سیلز ٹیکس کے لیے سندھ میں رائج موجودہ پازیٹو لسٹ نظام کو نیگیٹو لسٹ نظام میں تبدیل کیا جائے گا، جس کا مطلب یہ ہوگا کہ تمام سروسز قابلِ ٹیکس ہوں گی سوائے ان کے جو نیگیٹو لسٹ میں شامل ہوں گی۔ ان کا ماننا ہے کہ اس اقدام سے سیلز ٹیکس کا دائرہ وسیع ہوگا اور ٹیرف سے متعلق تنازعات اور قانونی چارہ جوئی میں بھی کمی آئے گی۔

موجودہ قانون کے تحت تمام بڑی سروسز قابلِ ٹیکس ہیں جبکہ ایک چھوٹا سا طبقہ سروسز ٹیکس سے مستثنیٰ ہے۔ اس صورتحال سے سروسز کی ٹیکسیشن پر تنازعات پیدا ہوتے ہیں، جو غیر ضروری قانونی چارہ جوئی اور ٹیکس دہندگان کے لیے مشکلات کا سبب بنتے ہیں۔ اسی لیے یہ فیصلہ کیا جا رہا ہے کہ نیگیٹو لسٹ کے نظام کی طرف منتقل ہوا جائے، جس کے تحت تمام سروسز کو قابلِ ٹیکس قرار دیا جائے گا، تاہم اس بات کا خاص خیال رکھا جائے گا کہ لازمی اور سماجی خدمات کو ٹیکس سے مستثنیٰ رکھا جائے اور نئی سروسز کے ایک بڑے حصے پر کم شرح سے ٹیکس عائد کیا جائے۔

مزید یہ کہ چھوٹے کاروبار کے تحفظ کے لیے سالانہ 40 لاکھ روپے سے کم ٹرن اوور رکھنے والے کاروبار سیلز ٹیکس کی ادائیگی سے مستثنیٰ رہیں گے۔

کاپی رائٹ بزنس ریکارڈر 2025