جنرل نے جنوری میں ایک زیر زمین میزائل اڈے کے دورے کے دوران تہران کے دشمنوں کو خبردار کرتے ہوئے کہا تھا کہ اگر تم نے ذرا سی بھی غلطی کی، تو ہم تم پر جہنم کے دروازے کھول دیں گے۔

1960 میں وسطی ایران میں پیدا ہونے والے حسین سلامی نے 1980 میں عراق کے آمر صدام حسین کی جانب سے شروع کی گئی آٹھ سالہ خونی جنگ کے آغاز پر اسلامی انقلابی گارڈ کور میں شمولیت اختیار کی۔

حسین سلامی نے اپنی زیادہ تر فوجی زندگی پاسداران انقلاب میں گزاری — یہ فورس 1979 کے انقلاب کے بعد مغرب نواز شاہ کو ہٹائے جانے کے بعد اسلامی انقلاب کے مقاصد کے تحفظ کے لیے بنائی گئی تھی۔

بین الاقوامی ادارہ برائے اسٹریٹجک اسٹڈیز** کے مطابق پاسداران انقلاب میں تقریباً 1,25,000 اہلکار ہیں، اگرچہ ایران نے کبھی سرکاری طور پر اس کی تصدیق نہیں کی۔

حسین سلامی نے فورس کے ایرو اسپیس ڈویژن کی سربراہی بھی کی اور ان کے نام کو امریکی پابندیوں کی فہرست میں شامل کیا گیا۔

انہوں نے نو سال تک پاسداران کے نائب سربراہ کے طور پر خدمات انجام دیں، اور پھر 2019 میں ایک بڑے فوجی ردوبدل کے دوران انہیں سربراہ مقرر کیا گیا۔

ایران کے بانی آیت اللہ روح اللہ خمینی نے فلسطینیوں کی حمایت کو ایرانی خارجہ پالیسی کا مرکزی نکتہ قرار دیا تھا، اور حسین سلامی اکثر اسرائیل کو نقشے سے مٹانے کی بات کرتے تھے۔

انہوں نے 2018 میں ایک تقریر میں اسرائیلی وزیرِ اعظم نیتن یاہو کو مخاطب کرتے ہوئے کہا تھا کہ تمہیں بحیرہ روم میں تیرنا سیکھ لینا چاہیے تاکہ بھاگنے کے قابل ہو سکو۔

پاسداران انقلاب نے عرب دنیا میں ایران کی جارحانہ خارجہ پالیسی میں مرکزی کردار ادا کیا، جس میں ایران کے حمایت یافتہ عسکری گروپ — حماس اور حزب اللہ — نے بالترتیب غزہ اور لبنان سے اسرائیل کے خلاف جنگ چھیڑی۔

یہ دونوں محاذی جنگیں ایران اور اسرائیل کے درمیان براہِ راست جھڑپوں کا باعث بنیں، جو گذشتہ سال شروع ہوئیں اور بالآخر جمعے کو اسرائیل کی جانب سے ایران پر بڑے پیمانے پر فضائی حملوں کا سبب بنیں — جن میں سے ایک حملے میں حسین سلامی شہید ہو گئے۔