کاروبار کے اختتام پر ڈالر کے مقابلے میں قدر 20 بیسے کم ہونے کے بعد روپیہ 282 روپے 67 پیسے پر بند ہوا۔

Rupee's Performance Against US Dollar Since 04 March 2025

یاد رہے کہ بدھ کے روز روپیہ 282.47 روپے پر بند ہوا تھا۔

بین الاقوامی سطح پر، امریکی ڈالر میں جمعرات کو کمی دیکھنے میں آئی، کیونکہ اشارے ملے ہیں کہ امریکی صدر ڈونلڈ ٹرمپ ٹیرف مذاکرات میں نرم رویہ اختیار کر سکتے ہیں اور امریکی فیڈرل ریزرو کی جانب سے شرح سود میں کمی کی توقعات بڑھ گئی ہیں۔

ٹرمپ نے بدھ کو کہا کہ وہ 8 جولائی کی ڈیڈ لائن میں توسیع کے لیے تیار ہیں تاکہ ان ممالک کے ساتھ تجارتی مذاکرات مکمل کیے جا سکیں جن پر امریکی ٹیرف لاگو ہونا ہے۔

امریکی وزیر خزانہ اسکاٹ بیسنٹ نے اس سے قبل اشارہ دیا تھا کہ وہ ممالک جو نیک نیتی سے مذاکرات کر رہے ہیں، ان کے لیے ڈیڈ لائن میں توسیع کی جا سکتی ہے۔

ان بیانات سے امریکی ڈالر دباؤ میں آیا، جس کا فائدہ یورو کو ہوا جو سات ہفتے کی بلند ترین سطح 1.1525 ڈالر تک پہنچ گیا۔

ڈالر جاپانی ین کے مقابلے میں 0.43 فیصد اور سوئس فرانک کے مقابلے میں 0.34 فیصد کمزور ہوا، جس کے بعد وہ بالترتیب 143.98 ین اور 0.81725 فرانک پر ٹریڈ کر رہا تھا۔

کرنسیوں کے مجموعی انڈیکس کے مقابلے میں، امریکی ڈالر 22 اپریل کے بعد کم ترین سطح 98.327 پر آ گیا۔

تیل کی قیمتیں، جو کرنسی کی قدر کا اہم اشارہ سمجھی جاتی ہیں، جمعرات کو ایشیائی سیشن کے دوران ابتدائی اضافے کے بعد کم ہو گئیں، کیونکہ مارکیٹ شرکاء نے مشرق وسطیٰ سے امریکی اہلکاروں کی منتقلی کے فیصلے کا جائزہ لیا، جو ایران کے جوہری پروگرام پر ہونے والی بات چیت سے قبل سامنے آیا ہے۔

برینٹ کروڈ فیوچرز 30 سینٹ یا 0.4 فیصد کمی کے ساتھ 69.47 ڈالر فی بیرل پر ٹریڈ کر رہے تھے، جبکہ امریکی ویسٹ ٹیکساس انٹرمیڈیٹ کروڈ 23 سینٹ یا 0.3 فیصد کمی کے ساتھ 67.92 ڈالر فی بیرل پر ٹریڈ ہو رہا تھا۔

ایک روز قبل، برینٹ اور ڈبلیو ٹی آئی دونوں کی قیمتوں میں 4 فیصد سے زیادہ اضافہ ہوا تھا اور وہ اپریل کے اوائل کے بعد بلند ترین سطح پر پہنچ گئی تھیں۔