پاکستان اسٹاک ایکسچینج (پی ایس ایکس) کو جمعہ کے روز جاری کردہ ایک نوٹس میں کمپنی نے یہ پیش رفت شیئر کی۔

نوٹس میں کہا گیا کہ ہمارے 9 مئی 2025 کے پہلے نوٹس کے تسلسل میں، جس میں 23 مئی 2025 تک کمپنی کی پیداواری سرگرمیوں کی عارضی معطلی میں توسیع کی اطلاع دی گئی تھی، یہ مطلع کیا جاتا ہے کہ جن حالات کی بنیاد پر معطلی کا فیصلہ کیا گیا تھا وہ اب بھی برقرار ہیں، کیونکہ ٹریکٹر انڈسٹری میں مسلسل مندی کے باعث صارفین کے آرڈرز موصول نہیں ہو رہے۔

لہٰذا، کمپنی کی انتظامیہ نے پیداواری سرگرمیوں کی معطلی میں مزید توسیع کا فیصلہ کیا ہے، جو اب 13 جون 2025 تک جاری رہے گی۔

گزشتہ ماہ، بولان کاسٹنگز لمیٹڈ نے 28 اپریل سے 9 مئی تک پیداواری سرگرمیاں عارضی طور پر بند کرنے کا اعلان کیا تھا اور اس کی وجہ صارفین کے آرڈرز میں کمی کو قرار دیا تھا۔

اس وقت کمپنی کا کہنا تھا کہ یہ فیصلہ کمپنی کی انتظامیہ نے گرتی ہوئی سیلز کی صورت حال کے پیش نظر آپریشنز کو ایڈجسٹ کرنے کے لیے کیا ہے۔

بولان کاسٹنگز لمیٹڈ کو 1982 میں پاکستان میں بطور پبلک لمیٹڈ کمپنی شامل کیا گیا تھا۔ یہ کمپنی ٹریکٹرز اور آٹوموٹیو پارٹس کے لیے کاسٹنگ کی تیاری اور فروخت کے شعبے میں سرگرم ہے۔

کمپنی کے تازہ ترین مالیاتی نتائج کے مطابق، مارچ 2025 کو ختم ہونے والی تیسری سہ ماہی میں کمپنی نے 622.19 ملین روپے کی نیٹ سیلز ریکارڈ کیں، جبکہ گزشتہ سال اسی مدت کے دوران یہ 953.70 ملین روپے تھیں۔

تیسری سہ ماہی میں بولان کاسٹنگز لمیٹڈ نے 15.31 ملین روپے بعد از ٹیکس منافع (پی اے ٹی) ظاہر کیا، جو گزشتہ سال اسی مدت کے 68.50 ملین روپے کے پی اے ٹی کے مقابلے میں نمایاں کمی کو ظاہر کرتا ہے۔