برینٹ کروڈ فیوچرز کی قیمت 12 سینٹس اضافے کے ساتھ 65.66 ڈالر فی بیرل جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ کی قیمت 16 سینٹس بڑھ کر 62.85 ڈالر فی بیرل ہو گئی۔

ایران کے نائب وزیر خارجہ مجید تخت روانچی نے پیر کو ایرانی سرکاری میڈیا سے گفتگو میں کہا کہ اگر امریکا یورینیم افزودگی کی سرگرمیاں مکمل طور پر ختم کرنے پر اصرار کرتا ہے تو یہ مذاکرات کہیں نہیں جائیں گے۔

اتوار کو امریکی خصوصی ایلچی اسٹیو وٹکوف نے اعادہ کیا کہ کسی بھی نئے معاہدے میں ایران کو افزودگی سے باز رہنے پر آمادہ کرنا ضروری ہو گا، کیونکہ یہ جوہری ہتھیاروں کی تیاری کا پہلا قدم ہوتا ہے۔

اسٹون ایکس کے تجزیہ کار ایلکس ہوڈس کے مطابق اگر مذاکرات کامیاب ہوتے تو امریکی پابندیاں نرم ہونے کا امکان ہے اور ایران اپنی تیل برآمدات میں یومیہ 300,000 سے 400,000 بیرل تک اضافہ کر سکتا ہے۔

دوسری جانب، ریٹنگ ایجنسی موڈیز کی جانب سے امریکا کی خودمختار کریڈٹ ریٹنگ میں کمی نے عالمی معیشت پر خدشات کو جنم دیا ہے، جو کہ دنیا کے سب سے بڑے توانائی صارف کی معاشی صورتحال کو متاثر کر سکتا ہے۔

چین میں صنعتی پیداوار اور ریٹیل فروخت میں سست روی نے بھی تیل کی قیمتوں پر دباؤ ڈالا، جبکہ روس-یوکرین جنگ، معاشی غیریقینی، ممکنہ ٹیرف اور امریکا-ایران مذاکرات کے تناظر میں آنے والے دنوں میں قیمتوں میں اتار چڑھاؤ متوقع ہے۔