سوشل میڈیا پلیٹ فارم ”ایکس“ پر اپنے پیغام میں صدر اردوان نے کہا کہ ترکیہ اور پاکستان کے درمیان بھائی چارہ دنیا کی چند ہی اقوام کو نصیب ہوتا ہے اور یہ سچی دوستی کی بہترین مثالوں میں سے ایک ہے۔

انہوں نے مزید کہا کہ ترکیہ کی حیثیت سے ہم پاکستان کے امن، سکون اور استحکام کو انتہائی اہمیت دیتے ہیں۔

صدر اردوان نے پاکستانی ریاست کی اس دانشمندانہ اور صبر و تحمل پر مبنی پالیسی کو بھی سراہا جو تنازعات کے حل کے لیے مکالمے اور مفاہمت کو ترجیح دیتی ہے۔

یہ پیغام وزیراعظم شہباز شریف کی جانب سے ”ایکس“ پر کیے گئے ایک پوسٹ کے جواب میں آیا، جس میں انہوں نے صدر اردوان کو ”پیارا بھائی“ قرار دیتے ہوئے مشکل وقت میں انقرہ کی غیر متزلزل حمایت کو سراہا۔

وزیراعظم شہباز شریف نے کہا کہ وہ اپنے پیارے بھائی اردوان کی مکمل حمایت اور پاکستان کے ساتھ ان کی غیر متزلزل یکجہتی پر دلی طور پر متاثر ہوئے ہیں۔

انہوں نے کہا کہ پاکستان کو ترکی کے ساتھ آزمودہ، فولادی بھائی چارے پر فخر ہے اور یہ رشتہ ہر نئے چیلنج کے ساتھ مزید مضبوط ہوتا جا رہا ہے۔

وزیراعظم نے صدر اردوان کی جنوبی ایشیا میں ثالثی کی کوششوں کو بھی سراہا اور انہیں تعمیری اور مربوط قرار دیا۔

گزشتہ ہفتے پاکستان اور بھارت کے درمیان کشیدگی اس وقت عروج پر پہنچی جب پاکستان نے آپریشن بنیان المرصوص کیا، جس کے بعد جنگ بندی عمل میں آئی۔

ترکیہ کے سفیر نے اسلام آباد میں پاکستان کے نائب وزیراعظم و وزیر خارجہ اسحاق ڈار سے ملاقات کی اور بھارت کی جانب سے پاکستان کی خودمختاری کی بلا اشتعال خلاف ورزی اور بے گناہ جانوں کے ضیاع پر ترکیہ کی جانب سے بھرپور یکجہتی کا پیغام پہنچایا۔

دونوں رہنماؤں نے علاقائی سلامتی کے امور پر تفصیلی تبادلہ خیال کیا اور قریبی تعاون و ہم آہنگی جاری رکھنے کے عزم کا اعادہ کیا۔