پاک فوج کے شعبۂ تعلقات عامہ (آئی ایس پی آر) کی جانب سے جاری بیان کے مطابق اس تجربے کا مقصد افواج کی آپریشنل تیاری کو یقینی بنانا اور میزائل کے جدید نیویگیشن سسٹم اور درست نشانے کی تکنیکی صلاحیتوں کو جانچنا تھا۔

چیئرمین جوائنٹ چیفس آف اسٹاف کمیٹی اور چیف آف آرمی اسٹاف نے تجربے میں حصہ لینے والے جوانوں، سائنسدانوں اور انجینئرز کو مبارکباد دی اور کہا کہ انہیں پاکستان آرمی کی آپریشنل تیاری اور تکنیکی مہارت پر مکمل اعتماد ہے، جو وطن عزیز کی علاقائی سالمیت کے خلاف کسی بھی جارحیت کا منہ توڑ جواب دینے کی صلاحیت رکھتے ہیں۔

تربیتی تجربے کو پاکستان آرمی کے سینئر افسران، اسٹریٹیجک اداروں کے افسران، سائنسدانوں اور انجینئرز نے موقع پر دیکھا۔

یہ تجربہ ایسے وقت میں کیا گیا ہے جب مقبوضہ کشمیر کے علاقے پہلگام میں ہونے والے ایک مہلک حملے کے بعد پاکستان اور بھارت کے درمیان کشیدگی بڑھ گئی ہے۔

اس سے قبل ہفتے کے روز بھی پاکستان نے ”ابدالی ویپن سسٹم“ کا کامیاب تربیتی تجربہ کیا تھا، جو 450 کلومیٹر تک مار کرنے کی صلاحیت رکھتا ہے۔ یہ تجربہ بھی پاک فوج کے شعبۂ تعلقات عامہ کے مطابق کامیابی سے مکمل ہوا۔