پاکستان اسٹاک ایکسچینج (پی ایس ایکس) کے جاری کردہ نوٹس کے مطابق سپرنیٹ لمیٹڈ نے ریکوڈک مائننگ کمپنی کے ساتھ اسٹریٹجک شراکت داری کا اعلان کیا۔

نوٹس کے مطابق سپرنیٹ لمیٹڈ ریکوڈک مائننگ کمپنی کے ساتھ اسٹریٹجک شراکت داری کا اعلان کرتے ہوئے خوشی محسوس کررہا ہے تاکہ بلوچستان میں ریکوڈک کاپر اور گولڈ مائن میں جدید ترین انٹرنیٹ اور مواصلاتی انفرااسٹرکچر فراہم کیا جاسکے۔

اعلامیے میں کہا گیا ہے کہ یہ شراکت داری کو پاکستان کے سب سے اہم معدنی منصوبوں میں سے ایک پر ڈیجیٹل کنیکٹیویٹی کو فروغ دینے میں ایک اہم قدم کے طور پر دیکھا جارہا ہے۔

سپرنیٹ لمیٹڈ کا کہنا ہے کہ وہ ریکو ڈک کے دور دراز اور چیلنجنگ علاقے میں بغیر کسی رکاوٹ کے آپریشنز کو یقینی بنانے کے لیے مضبوط، محفوظ اور اسکیل ایبل کمیونیکیشن سلوشنز فراہم کرے گا۔

سپرنیٹ لمیٹڈ کے ہیڈ آف سیلز ڈیفنس ضیا طارق نے کہا کہ یہ شراکت داری پاکستان کے اسٹریٹجک شعبوں کو عالمی معیار کی ٹیکنالوجی کے ذریعے بااختیار بنانے کے لیے سپرنیٹ لمیٹڈ کے غیر متزلزل عزم کی عکاسی کرتی ہے۔ ریکوڈک قومی اہمیت کا منصوبہ ہے اور ہمیں بلوچستان کے دور افتادہ علاقوں میں سے ایک میں رابطے کو ممکن بنانے میں اپنا کردار ادا کرنے پر فخر ہے۔ ہمارے حل محفوظ، موثر اور پائیدار کان کنی کے آپریشنز کی حمایت کریں گے۔

یہ بات قابل ذکر ہے کہ بیریک گولڈ ریکو ڈک کان میں 50 فیصد حصص کی مالک ہے جبکہ پاکستان اور صوبہ بلوچستان کی حکومتیں باقی 50 فیصد حصص کی مالک ہیں۔

بیریک گولڈ ریکو ڈک کان کو دنیا کے سب سے بڑے غیر ترقی یافتہ تانبے اور سونے کے ذخائر میں سے ایک سمجھتا ہے اور توقع ہے کہ اس کی ترقی سے پاکستان کی جدوجہد کرنے والی معیشت پر نمایاں اثرات مرتب ہوں گے۔

بیریک گولڈ کے سی ای او نے رواں ماہ کے آغاز میں کہا تھا کہ یہ منصوبہ پاکستان کو عالمی معدنیات کے نقشے پر ایک چراغ کی مانند بنا دے گا۔

انہوں نے کہا کہ یہ کان دنیا کے سب سے کم لاگت والے تانبے کی پیداوار کرنے والوں میں شامل ہونے والی ہے۔

یہاں تک کہ یہ یقین کرنے کی ہر وجہ ہے کہ ریکو ڈک اس صدی کے آخر تک بھی کام کرتا رہے گا۔

انہوں نے بتایا کہ پیداوار 2028 میں شروع ہونے کی توقع ہے اور سالانہ 240,000 ٹن تانبے اور 300,000 اونس سونے کی پیداوار کا ہدف رکھا گیا ہے۔