کاروبار کے اختتام پر ڈالر کے مقابلے میں قدر 10 پیسے بڑھنے کے بعد روپیہ 280 روپے 78 پیسے پر بند ہوا۔

یاد رہے کہ پیر کو ڈالر کے مقابلے میں روپیہ 280.87 روپے پر بند ہوا تھا۔

منگل کو ڈالر اپنی 3 سال کی کم ترین سطح کے قریب رہا کیونکہ صدر ڈونلڈ ٹرمپ کی جانب سے فیڈرل ریزرو کے چیئرمین پر مسلسل تنقید نے امریکی معیشت پر سرمایہ کاروں کے اعتماد کو مزید کمزور کردیا ہے۔

امریکی کرنسی سوئس فرانک کے مقابلے میں گزشتہ روز کی دہائی کی کم ترین سطح کے قریب گرگئی اور یورو کے مقابلے میں ساڑھے 3 سال کی کم ترین سطح کے آس پاس منڈلاتی رہی۔

پیر کو صدر ٹرمپ نے ٹروتھ سوشل پر ایک پوسٹ میں فیڈ کے چیئرمین جیروم پاول پر اپنی تنقید میں شدت لاتے ہوئے انہیں بڑا ناکام شخص قرار دیا اور مطالبہ کیا کہ وہ سود کی شرحیں فوری طور پر کم کریں، ورنہ معیشت سست روی کا شکار ہوسکتی ہے۔

جمعہ کو وائٹ ہاؤس کے اقتصادی مشیر کیون ہیسیٹ نے کہا تھا کہ صدر اور ان کی ٹیم اس بات کا جائزہ لے رہی ہے کہ آیا وہ پاول کو برطرف کر سکتے ہیں یا نہیں۔