تاہم مارچ 2025 میں سرمایہ کاری میں اچانک اور شدید کمی دیکھنے میں آئی، جب خالص سرمایہ کاری 294.2 ملین ڈالر سے گر کر صرف 25.7 ملین ڈالر رہ گئی، جو اس بہتری کی ناپائیدار اور غیر متوازن نوعیت کو ظاہر کرتی ہے۔

مارچ 2025 حالیہ برسوں کے دوران ایف ڈی آئی کی سب سے کمزور کارکردگی کا حامل مہینہ رہا۔ مجموعی سرمایہ کاری 176.6 ملین ڈالر رہی، جو مارچ 2024 کے مقابلے میں 49 فیصد کم تھی، جبکہ سرمائے کے انخلاء میں تیزی آئی اور وہ 150.8 ملین ڈالر تک پہنچ گئے — جو پچھلے سال کے مقابلے میں تین گنا زیادہ تھا۔

مارچ میں سب سے زیادہ سرمائے کا انخلاء توانائی (پاور) کے شعبے سے ہوا۔ دیگر شعبوں جیسے ٹیلی کام اور مائننگ (کان کنی) میں بھی سرمائے کا اخراج دیکھا گیا۔ اس کے برعکس، مالیاتی خدمات کے شعبے میں خالص سرمایہ کاری آئی۔

مالی سال 25 کے ابتدائی نو ماہ کے دوران خالص ایف ڈی آئی میں 42 فیصد حصہ چین کا تھا، جس نے 684.5 ملین ڈالر کی سرمایہ کاری کی — جو گزشتہ سال کی اسی مدت کے مقابلے میں دو گنا سے بھی زیادہ ہے۔ اس اضافے کی وجہ سی پیک کے تحت جاری منصوبے اور توانائی کے شعبے میں سرمایہ کاری ہے۔

دیگر بڑے سرمایہ کار ممالک میں برطانیہ، ہانگ کانگ اور سوئٹزرلینڈ شامل ہیں، جو پاکستان کے روایتی شراکت دار سمجھے جاتے ہیں۔ اس سال کا رجحان ماضی سے مختلف رہا، جہاں توانائی کا شعبہ سرفہرست رہا کرتا تھا، اس بار مالیاتی خدمات کا شعبہ سب سے زیادہ ایف ڈی آئی حاصل کرنے میں کامیاب رہا، جس کے بعد توانائی کا شعبہ رہا۔

مالی سال 25 کے ابتدائی نو ماہ کے دوران پاکستان میں ایف ڈی آئی میں گزشتہ سال کے مقابلے میں معمولی بحالی دیکھنے میں آئی، جس کی قیادت چین کی سرمایہ کاری اور مالیاتی شعبے کی مضبوطی نے کی۔

تاہم مارچ 2025 کی سرمایہ کاری میں گراوٹ اور سرمائے کے بڑھتے ہوئے انخلا نے سرمایہ کاری کے ماحول کی کمزوری کو اجاگر کر دیا ہے۔ جب تک توانائی، ٹیلی کام اور حکومتی نظام میں پائیدار اصلاحات نہ کی جائیں، اور سرمایہ کاروں اور شعبوں کی بنیاد کو متنوع نہ بنایا جائے، پاکستان میں ایف ڈی آئی کے یہ فوائد عارضی ثابت ہو سکتے ہیں۔