وزارت دفاع کی ایک رپورٹ میں کہا گیا ہے کہ روسی فورسز نے زیلینے پول گاؤں پر قبضہ کرلیا ہے جو پوکروفسک اور ویلیوکا نووسلکا کے درمیان واقع ہے جسے روسی فوج نے پچھلے ماہ کے آخر میں اپنے قبضے میں لیا تھا۔

روسی رپورٹ کے مطابق ڈاچنے گاؤں بھی قبضے میں لے لیا گیا ہے جو کہ کوراخوو کے مغرب میں واقع ہے جس پر روسی فوج نے پچھلے ماہ قبضہ کیا تھا۔ واضح رہے کہ یہاں ہفتوں تک شدید لڑائیاں ہوچکی تھیں۔

یوکرینی فوج کے جنرل اسٹاف نے رات دیر سے ایک رپورٹ میں کہا کہ دونوں گاؤں پوکرووسک کے علاقے میں روسی حملے کا شکار ہونے والی 11 بستیوں میں شامل ہیں، تاہم اس رپورٹ میں ان گاؤں کے روسی قبضے میں آنے کا کوئی ذکر نہیں کیا گیا۔

روئٹرز آزادانہ طور پر دونوں جانب سے جنگ کی اطلاعات کی تصدیق نہیں کرسکا۔

یوکرین کے ڈیپ اسٹیٹ ملٹری بلاگ، جو اوپن سورس رپورٹس کی بنیاد پر فرنٹ لائن پوزیشنوں پر نظر رکھتا ہے، نے اس ہفتے کہا تھا کہ روسی افواج نے زیلین پول اور ڈاچنے کے قریب پیش قدمی کی ہے۔

روس کی افواج فروری 2022 میں کیف پر حملہ کرنے میں ناکام رہیں اور اس کے بعد انہوں نے مشرقی یوکرین کے ڈنباس علاقے، جو ڈونیٹسک اور لوہانسک پر مشتمل ہے، پر قبضہ کرنے پر اپنی توجہ مرکوز کرلی۔

وہ کئی مہینوں سے ڈونیٹسک کے علاقے میں مسلسل پیش قدمی کر رہے ہیں اور متعدد گاؤں پر قابض ہو چکے ہیں۔

تاہم یوکرین کے صدر ولادیمیر زیلینسکی نے جمعرات کے روز پوکروفسک کے قریب واقع ایک رجمنٹ کی ’اچھی کامیابی‘ کی تعریف کی۔

کم از کم ایک غیر ملکی بلاگر نے علاقے میں یوکرین کے جوابی حملوں کا ذکر کیا ہے۔