آئی ایس پی آر کا کہنا ہے کہ 18 اور 19 جنوری کی رات کو سیکورٹی فورسز نے ضلع ژوب کے علاقے سمبازہ میں پاک افغان سرحد کے ذریعے خوارج (دہشتگردوں) کے ایک گروہ کی دراندازی کی کوشش کا پتہ لگایا۔

آئی ایس پی آر کے مطابق فورسز نے فوری طور پر کارروائی کرتے ہوئے خوارج کی دراندازی کی کوشش ناکام بنائی جس کے نتیجے میں 5 خوارج واصل جہنم ہوگئے۔

ضلع ژوب پاکستان کے صوبہ بلوچستان کے شمال مغربی حصے میں واقع ہے۔

اسلام آباد مسلسل عبوری افغان حکومت سے مطالبہ کرتا رہا ہے کہ کہ وہ اپنی جانب سرحد پر موثر سرحدی انتظام کو یقینی بنائے۔

گزشتہ ماہ پاکستان اور افغانستان نے جاری کشیدگی کو کم کرنے، دوطرفہ تعلقات کو مضبوط بنانے اور دونوں ہمسایہ ممالک کے درمیان تجارتی اور اقتصادی تعلقات کو فروغ دینے پر اتفاق کیا تھا۔

پاکستان کے نمائندہ خصوصی محمد صادق 2 روزہ سرکاری دورے پر کابل پہنچے تھے جہاں انہوں نے اہم افغان وزراء اور تاجروں سے مسلسل اہم ملاقاتیں کیں۔ انہوں نے کابل میں افغان وزیر خارجہ امیر خان متقی سے بھی ملاقات کی۔

آئی ایس پی آر کی جانب سے جاری بیان میں کہا گیا ہے کہ عبوری افغان حکومت سے توقع کی جاتی ہے کہ وہ اپنے وعدوں کو پورا کرے گی اور پاکستان کے خلاف دہشت گردی کے حملوں کے لیے خوارج کو افغان سرزمین کے استعمال کی اجازت نہیں دے گی۔