اسٹیٹ بینک کے تازہ ترین اعداد و شمار کے مطابق رواں مالی سال کے پہلے نو ماہ کے دوران ترسیلات زر میں سالانہ بنیادوں پر 0.9 فیصد اضافہ دیکھا گیا۔ اسٹیٹ بینک کے مطابق نو ماہ کے دوران ترسیلات زر 21.4 ارب ڈالر رہیں۔ اگرچہ اس دوران ترسیلات زر میں اضافہ ایک فیصد سے بھی کم تھا، لیکن گزشتہ تین ماہ کے دوران شرح نمو میں کمی کے پیش نظریہ ایک بہتر صورتحال ہے۔

اسٹیٹ بینک کے اعداد و شمار سے پتہ چلتا ہے کہ مارچ میں ترسیلات زر 2.95 ارب ڈالر سے زائد رہیں، جو کہ سالانہ بنیاد پر 16 فیصد سے زیادہ ہے اور ماہنا بنیاد پراضافہ 31 فیصد سے زیادہ تھا۔ رواں سال مارچ میں ترسیلات زر کی آمد اپریل 2022 کے بعد سب سے زیادہ تھی۔

خاص طور پر مارچ میں ترسیلات زر میں اضافہ بنیادی طور پر رمضان کی وجہ سے ہوا ہے۔ خیراتی اداروں کو زکوٰۃ کی ادائیگیوں کے ساتھ بیرون ملک مقیم پاکستانیوں نے رمضان اور عید کے اخراجات کیلئے خاندانوں کو رقم بھیجی۔ جس سے ترسیلات زر میں اضافہ ہوا۔ تاریخی رجحان بتاتا ہے کہ رمضان اور عید کے دو مہینوں میں ترسیلات زر میں اضافہ ہوتا ہے۔ایسا ہی مارچ میں بھی دیکھنے میں آیا۔

مجموعی طور پر رواں مالی سال کے نو ماہ میں ترسیلات زر کی صورتحال خراب رہی۔ جہاں کچھ ممالک سے رقوم کی آمد میں منفی نمو ہوئی ، وہیں زیادہ تر ممالک نے ترسیلات زر میں اضافہ کیا۔ سعودی عرب بدستورترسیلات زر بھیجنے والوں میں پہلے نمبر پر ہے، جس کے بعد متحدہ عرب امارات، برطانیہ اور امریکہ ہیں۔